भारतमा एकैदिन अहिलेसम्मकै धेरै संक्रमित थपिए, संक्रमितको संख्या ४० लाख नाघ्यो

काठमाडौं – भारतमा कोरोनाभाइरसबाट संक्रमित हुनेको संख्या ४० लाख २० हजार पुगेको छ ।

तीमध्ये करीब ३१ लाख चार हजार निको भएका छन् । त्यहाँ ८ लाख ४६ हजार उपचाररत संक्रमित छन् । तीमध्ये आठ हजार ९४४ जनाको अवस्था गम्भीर छ ।

शुक्रबार एकैदिन अहिलेसम्मकै सबैभन्दा बढी ८७ हजार ११५ नयाँ संक्रमित भेटिए । भारतमा कोरोनाबाट मृत्यु हुनेको संख्या ६९ हजार ६३५ पुगेको छ । विश्वमा कोरोनाबाट धेरै मृत्यु हुनेको देशको सूचीमा भारत तेस्रो नम्बरमा छ ।

सबैभन्दा बढी अमेरिकामा एक लाख ९२ हजार र ब्राजिलमा एक लाख २५ हजारको मृत्यु भएको छ । विश्वमा अहिलेसम्म कोरोनाबाट आठ लाख ७८ हजारको मृत्यु भएको छ ।

विश्वमा कुल संक्रमितको संख्या दुई करोड ६७ लाख ७३ हजार नाघेको छ । तीमध्ये करीब एक करोड ८८ लाख ८० हजार संक्रमणमुक्त भएका छन् ।