टोकियो – वाल स्ट्रीटमा प्रविधि कम्पनीहरुको वर्चस्व रहेको शेयरमा गिरावट देखिएसँगै शुक्रबार एशियाली शेयर बजारमा पनि त्यसको प्रभाव परेको छ। यसदिन एशियाली शेयर बजारमा दुई साताकै खराब अवस्था देखिएको छ ।
शुक्रबार जापान बाहिरको एशिया–प्यासिफिक शेयरमा १.६ प्रतिशतको गिरावट देखिएको छ। यसैगरी, जापानको निक्केई सूचक १ प्रतिशतले घटेको छ।
त्यस्तै हङकङको हाङसेङ १.८ प्रतिशत र अस्ट्रेलियाको एएसएक्स २०० सूचक २.८ प्रतिशतले घटेको छ।
अमेरिकाको सबैभन्दा ठूला पाँच अमेरिकी कम्पनीहरुको शेयरमा गिरावट देखिएसँगै बिहीबार वाल स्ट्रीटको स्टक उल्टियो।
प्रविधि कम्पनीको वर्चस्व रहेको नास्डाक सूचकमा ५ प्रतिशतको गिरावट देखियो। यसैगरी एसएण्डपी ५०० सूचक ३.५ प्रतिशत र डउजोन्स करिब ३ प्रतिशतले घटेको छ।
जुन कम्पनी (एप्पल, अमेजन, अल्फाबेट, माइक्रोसफ्ट र फेसबुक) ले अमेरिकी शेयर बजारलाई उच्च रेकर्ड कायम गर्नका लागि सहायता प्रदान गरे ती कम्पनीहरुको शेयरमा नै ४ देखि ८ प्रतिशतसम्मको गिरावट देखियो।
यसैगरी, एप्पलमा ८ प्रतिशत, टेस्लामा ९ प्रतिशत र माइक्रोसफ्टमा ६ प्रतिशतको गिरावट देखियो।
