नेपाली सैनिकको शव लिन अफ्रिका उड्यो श्री एयरलाइन्स

काठमाडौं – लिबियामा मृत्यु भएका एक नेपाली सेनाको शव लिन श्री एयरलायन्सको विमान ट्युनिसिया उडेको छ । अफ्रिकी मुलुक लिबियामा २१ दिनअघि हृदयघातबाट मृत्यु भएका नेपाली सेनाको शव लिन विमान बिहान ७ बजे ट्युनिसिया उडेको हो ।

काठमाडौंबाट उडेको यो विमान ओमानको मस्कट, इजिप्टको कायरो हुँदै बिहीबार बेलुकी ट्यनिसियाको राजधानी ट्य्निसस्थित कार्थेज अन्तर्राष्ट्रिय विमानस्थलमा अवतरण गर्ने छ । यो चार्टर उडान संयुक्त राष्ट्रसंघको खर्चमा नेपाली सेनाले काठमाडौंबाट गराएको हो ।

लिबियामा रहेको संयुक्त राष्ट्र संघको सहायता मिसनमा खटिएका झापा मूल घर भएका एक जमदारको मे १ तारिख हृदयघातका कारण मृत्यु भएको थियो । ती सैनिकको शव बोकेर उक्त विमान शुक्रबार दिउँसो काठमाडौं फर्किने नेपाली सेनाका प्रवक्ता विज्ञानदेव पाण्डेले जानकारी दिए ।