काठमाडौं – सुविन भट्टराईको उपन्यास ‘समर लभ’को कथामा बनेको फिल्म ‘समर लभ’ आगामी शुक्रबारबाट प्रदर्शनमा आउँदैछ । प्रदर्शन मिति नजिकिदै गर्दा निर्माण युनिटले फिल्मको ‘गुनासो छैन’ बोलको गीत सार्वजनिक गरेको छ ।
सोमबार सार्वजनिक गीतमा गायक पुष्पन प्रधानको स्वर, शब्द र संगीत रहेको छ । गीतमा अभिनेतामार्फत फिल्मको पात्र अतितको प्रेम पीडा देखाइएको छ । मुस्कान ढकालले निर्देशन गरेको फिल्ममा सुविनको कथा तथा सामीप्यराज तिमल्सेनाको पटकथा रहेको छ । संवाद भने सुविन र सामीप्यले मिलेर गाएका हुन् ।
खगेन्द्र श्रेष्ठ र इन्दु भण्डारी निर्माता रहेको फिल्ममा विनोद अधिकारी कार्यकारी निर्माता रहेका छन् । स्वपन सरकार र मनोज विक सह–निर्माता रहेको फिल्ममा सञ्जय लामाको छायाँकन, अर्जुन जिसीको सम्पादन रहेको छ ।
सुरजसिंह ठकुरी लेखकको भूमिका निर्वाह गरेको फिल्ममा अभिनेत्री नम्रता सापकोटा सुस्मिताले भूमिका निर्वाह गरेकी छन् ।
