काठमाडौँ – नेकपाका अध्यक्ष पुष्पकमल दाहाल प्रचण्ड र नेकपा माओवादी क्रान्तिकारीका अध्यक्ष मोहन बैद्यले आज एउटै मञ्चमा बसेर जीवन शर्माका गीत सुन्नुहुने भएको छ ।
जनवादी गायक शर्माका १० वटा गीत सुनाउने अवसर जुटाउन लागेको हो, इच्छुक सांस्कृतिक प्रतिष्ठानले । सो प्रतिष्ठानले शुक्रबार दिउँसो साढे ४ बजे जीवन शर्मा संयुक्त साँकृतिक कार्यक्रम गर्न लागेको हो ।
कार्यक्रममा प्रमुख अतिथिका रुपमा प्रचण्ड र बैद्यलाई डाकिएको छ । साँस्कृतिक साँझमा शर्माले १० वटा जनवादी गीत प्रस्तुत गर्नेछन् भने सामना साँस्कृतिक परिवार, रक्तिम सांस्कृतिक परिवारको गीत र नृत्य तथा सुवोध गौतमले हाँस्यब्यङ्ग्य प्रस्तुती दिने कार्यक्रम रहेको छ ।
शर्माका सिमली छाँयामा बसी भरिया लामो सास फेरेको, झर्नाको चिसो पानी लगायतका जनवादी गीतहरु चर्चित रहेका छन् ।
कार्यक्रममा खानेपानी मन्त्री बिना मगर, श्रम तथा रोजगार मन्त्री गोकर्ण विष्ट, वन तथा वातावरण मन्त्री शक्ति बस्नेत लगायत सहभागी हुने बद्री चुडालले जानकारी दिनुभयो ।
