‘जे भने नि हुन्छ मलाई, पैसा लाग्दैन
म दुखीलाई जे गरे नि, दुख लाग्दैन ।’
ठ्याक्कै तीजको ‘ह्याप्पी इन्डिङ’ भएपछि अभिनेता हरिवंश आचार्यले आफ्नो गीतको श्रव्यदृश्य सार्वजनिक गरे । तीजमा चेलीहरु माइतीसमक्ष आफ्ना दुख-सुख गीतमार्फत पोख्ने गर्छन् । तीज सकिए लगत्तै अभिनेता आचार्यले भने जीवनभोगाईका यर्थाथ पोखेका छन् । उनको गीतले भन्छ,
‘सत्तो सराप गरे हुन्छ, धन जाँदैन
सरापेरै के भो भने, दोष लाग्दैन ।’
गीतमा अरुप्रति चियोचर्चा गर्ने प्रवृत्तिमाथि कटाक्ष गरिएको छ । यो गीतको सर्जक उनै हुन् । गीत लेख्ने, त्यसमा लय खोज्ने र आवाज दिने । संगीत संयोजक हुन्, जीवित जल्मी । रेकर्डिस्ट हुन्, हरिशरण सायमी । उनलाई मादलमा जीवित जाल्मीले, बासुरीमा रबिन्द्र महर्जनले, गितारमा अन्ताज नकर्मीले र सारंगीमा हेमन्त कान्छा रसाइलीले साथ दिएका छन् ।
अभिनेता हरिवंश आचार्यको गीतलाई सुदन केसीले म्युजिक भिडियोमा उतारेका छन् । भिडियो दीर्घ गुरुङले खिचेका हुन् । मह संचारले प्रस्तुत गरेको यो म्युजिक भिडियो हालै सार्वजनिक गरिएको हो ।
त्यसो त अभिनेता हरिवंश भन्नसाथ रोमान्टिक वा हास्य भावको गीत सम्झने गरिन्छ । उनले यसअघि पनि थुप्रै गीत गाएका छन्, जसमा हास्यरस मिसिएकै हुन्छ । तर, यसपाली उनको गीत मात्र होइन, भावभंगीमा पनि गंभिर देखिन्छ ।
हेरौ भिडियो
