गोरखा – गोरखाको चुमनुब्री गाउँपालिकाको साम्दो मतदानकेन्द्रमा मतदान सकिएको छ । त्यहाँ मतदान सुरु भएको डेढ घण्टामा नै मतदान सकिएको मतदान अधिकृत रामकाजी दुवाडीले जानकारी दिनुभयो ।
उहाँका अनुसार साम्दो मतदानकेन्द्रमा ७१ जना मतदाता रहेकामा ६९ जनाले मतपत्र लगेका थिए । एक जना मतदाताको निधन भएको र अर्का एकजना आनी गाउँमा नभएकाले मतदान सकिएको औपचारिक जानकारी जनाउने तयारी भएको छ ।
भौगोलिक रुपमा विकट यो मतदानकेन्द्रमा मतदाता कम रहेकाले छिट्टै सकिएको मतदान अधिकृत रामकाजी दुवाडीले जानकारी दिनुभयो ।
यस्तै चुमनुब्री गाउँपालिकाको अरु मतदान केन्द्रमा पनि मतदाता कम भएकाले छिट्टै मतदान सकिने निर्वाचन अधिकृत हरिहर दाहालले बताउनुभयो । चुमनुब्री गाउँपालिकामा २० वटा मतदान केन्द्र तोकिएको छ ।
