समाचार सुन्नुहोस :
काठमाडौँ – दक्षिण कोरियामा आइतबार बिहान भएको विमान दुर्घटनामा मृत्यु हुनेको संख्या १२४ पुगेको छ। मृत्यु हुनेमा ५४ पुरुष र ५७ महिला भएको बीबीसीले जानकारी दिएको छ। त्यस्तै १३ जनाको शवको पहिचान अझै हुन सकेको छैन। उक्त दुर्घटनास्थलमा उद्धार र राहत कार्यका लागि ४९० दमकलकर्मी, ४५५ प्रहरी अधिकारीसहित १,५६२ जना खटिएका छन्।
दुर्घटना मुआन अन्तर्राष्ट्रिय विमानस्थलमा भएको हो। जेजु एयरको यो विमान बैंककबाट फर्कने क्रममा अवतरणका बेला दुर्घटनामा परेको थियो। विमानमा १७५ यात्रु र ६ चालक दलका सदस्यसहित १८१ जना सवार थिए।
दमकल विभागका अधिकारीहरूका अनुसार दुई व्यक्तिलाई जीवितै उद्धार गरिएको छ। योनहाप समाचार एजेन्सीले दिएको विवरणअनुसार विमानका अधिकांश यात्रु दक्षिण कोरियाका थिए भने दुईजना थाइल्याण्डका नागरिक थिए। उक्त घटनाले ठूलो जनधनको क्षति गराएको छ।घटना स्थलमा उद्धार टोलीहरू व्यापक खोज तथा राहत कार्यमा संलग्न छन्।
