समाचार सुन्नुहोस :
काठमाडौँ – राष्ट्रिय स्वतन्त्र पार्टी (रास्वपा)का सभापति रवि लामिछानेसहित सात जनाको सहकारी ठगी प्रकरणमा जिल्ला अदालत कास्कीमा बयान सकिएको छ। पोखराको सूर्यदर्शन सहकारीको रकम अपचलनसम्बन्धी मुद्दामा मंगलबार उनीहरूको बयान प्रक्रिया पूरा भएको हो। बयान दिने अन्य व्यक्तिहरूमा पूर्वडीआईजी छविलाल जोशी, लिला पछाईं, रामबहादुर खनाल, पूर्वसांसद मीना गुरुङ, कृष्णबहादुर गुरुङ र आरती गुरुङ सामेल छन्।
बयानपछि, मंगलबार दिउँसो २ बजेदेखि थुनछेक बहस सुरु भएको अदालतका स्रेस्तेदार राजन खनालले जानकारी दिए। बहसको क्रममा पहिलो चरणमा सरकारी वकिलले अभियोजन पक्षको तर्फबाट तर्क प्रस्तुत गर्नेछन्। त्यसपछि प्रतिवादी पक्षले बहस गर्नेछ र अन्त्यमा अभियोजन पक्षले जवाफी बहस गर्नेछन्। त्यसपछि थुनछेक आदेश जारी हुनेछ।
यो मुद्दा न्यायाधीश नितिज राईको इजलासमा परेको छ। सहकारी ठगी आरोपमा पक्राउ परेकाहरूविरुद्ध सम्पत्ति शुद्धीकरण र सङ्गठित अपराधसम्बन्धी मुद्दा पनि थपिएको छ।
