समाचार सुन्नुहोस :
काठमाडौँ – राष्ट्रपति रामचन्द्र पौडेलले भारतका पूर्वप्रधानमन्त्री डा. मनमोहन सिंहको निधनप्रति गहिरो शोक व्यक्त गरेका छन्। उनले सिंहलाई भारत र दक्षिण एसियाको लागि अद्वितीय योगदान दिने दूरदर्शी नेता र कुशल योजनाकारको रूपमा स्मरण गर्दै यो क्षति अपूरणीय भएको बताएका छन्।
शोक सन्देशमा राष्ट्रपति पौडेलले भनेका छन्, “डा. मनमोहन सिंह भारतका एक प्रख्यात नेता हुनुहुन्थ्यो, जसले आफ्नो कुशल नेतृत्वमार्फत भारत र दक्षिण एसियाको समग्र विकासमा महत्वपूर्ण योगदान दिनुभयो। उहाँको निधनले गहिरो शोक र क्षति पुगेको छ। म यस दुःखद घडीमा भारत सरकार, भारतीय जनसमुदाय र शोकाकुल परिवारप्रति आफ्नो गहिरो समवेदना व्यक्त गर्दछु।”
पूर्वप्रधानमन्त्री सिंहको निधन भारतीय समयअनुसार बिहीबार राति ९:५१ बजे नयाँदिल्लीस्थित एम्स अस्पतालमा उपचारका क्रममा भएको हो। सन् २००४ देखि २०१४ सम्म भारतको प्रधानमन्त्रीको जिम्मेवारी सम्हाल्नु भएका सिंहलाई उदारीकरण र आर्थिक सुधारका प्रमुख योजनाकारका रूपमा चिनिन्छ।
