काठमाडौं – गृहमन्त्री रमेश लेखकले हिरासतभित्र खिचिएको फोटो सार्वजनिक गर्नेमा संलग्न व्यक्तिहरूविरुद्ध कडा कारबाहीको निर्देशन दिएका छन् ।
सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछानेको हिरासतभित्रको तस्बिर सार्वजनिक भएपछि सुरक्षा व्यवस्थामा कमजोरी भएको भन्दै यसमा संलग्नहरूमाथि अनुसन्धान गर्न गृहमन्त्रीले प्रहरीलाई निर्देशन दिएका हुन् ।
सामाजिक सञ्जालमा रवि लामिछाने सुतिरहेको तस्बिर सार्वजनिक भएसँगै उक्त तस्बिर कसरी बाहिरियो भन्ने विषयमा चासो बढेको छ । गृहमन्त्री लेखकले प्रहरी महानिरीक्षक वसन्त कुँवरसँग संवाद गर्दै घटनाको गहिरो अनुसन्धान गरी दोषीलाई कारबाही गर्न भनेका छन् । गृहमन्त्रीले भने, ‘सुरक्षा व्यवस्थामा भएको लापरबाही स्वीकार्य छैन । घटना सम्बन्धमा छिटो अनुसन्धान गरी दोषीमाथि कडा कदम चालिनेछ ।’
सुरक्षा प्रणालीको कमजोरीलाई सुधार्ने प्रतिबद्धता व्यक्त गर्दै गृहमन्त्रीले यस प्रकारका घटनाहरू दोहोरिन नदिन विशेष सावधानी अपनाउन पनि निर्देशन दिएका छन् । सार्वजनिक फोटो रविकै भएको र उक्त फोटो आफूले खिचेको डा. निकोलस भुसालले दाबी गरेका छन् ।
