त्रिभुवन विमानस्थलबाट नोभेम्बरमा साढे ८ लाख यात्रु आवागमन

काठमाडौं – त्रिभुवन अन्तर्राष्ट्रिय विमानस्थलमा एक महिनामा साढे लाखभन्दा बढी यात्रु आवागमन र साढे १२ हजारभन्दा बढी उडान-अवतरण भएको छ ।

त्रिभुवन विमानस्थल नागरिक उड्डयन कार्यालयले बुधबार जारी गरेको तथ्यांक अनुसार सन् २०२४ नोभेम्बर महिनामा ८ लाख ५१ हजार २५ यात्रु आवागमन भएको छ । नोभेम्बरमा १२ हजार ५ सय २५ उडान-अवतरण भएको छ । दुवै संख्या आन्तरिक र अन्तर्राष्ट्रियतर्फको हो ।

नोभेम्बरमा अन्तर्राष्ट्रियतर्फ ४ लाख २९ हजार ८ सय ४७ यात्रु आवागमन भएको छ । कुल २ हजार ६ सय ४८ उडान-अवतरणबाट १ लाख ९९ हजार ४ सय ९५ यात्रु आगमन भएको छ भने २ लाख २९ हजार ७ सय ६३ यात्रु बाहिरिएका छन् ।

त्यसैगरी आन्तरिकतर्फ ४ हजार ९ सय ३३ अवतरण हुँदा २ लाख १९ हजार ४ सय ३० र ४ हजार ९ सय ४४ उडानबाट २ लाख १ हजार ७ सय ४८ यात्रु बाहिरिएका छन् । कुल आन्तरिक यात्रु आवागमन संख्या ४ लाख २ हजार १ सय ७८ पुगेको छ ।