समाचार सुन्नुहोस :
काठमाडौँ – पूर्व उपप्रधानमन्त्री तथा गृहमन्त्री रवि लामिछानेलाई अदालतमा उपस्थित गराइएको छ। राष्ट्रिय स्वतन्त्र पार्टीका सभापतिसमेत रहेका लामिछानेसहित पाँचजनालाई कास्की जिल्ला अदालतमा पेस गरिएको हो। उनीहरूविरुद्ध सहकारी ठगी, संगठित अपराध र सम्पत्ति शुद्धीकरण जस्ता तीनवटा मुद्दा दर्ता गर्ने तयारीमा प्रहरी जुटिरहेको छ।
प्रहरीले अनुसन्धान अझै जारी रहेको बताउँदै म्याद थपका लागि अदालतमा उपस्थित गराएको हो। कास्की अदालतमा मुद्दा हेर्ने क्रममा डीएसपी वसन्तकुमार शर्माले दिएको जानकारीअनुसार, सूर्यदर्शन सहकारी ठगीमा संलग्न भएको आरोपमा ५१ जना प्रतिवादीमाथि मुद्दा दायर गरिँदैछ। यसमा कुल १ अर्ब ५१ करोड बराबरको बीगो दाबी गरिने भएको छ।
सरकारी वकिल कार्यालयले लामिछानेविरुद्ध पुस ५ गते अभियोग पत्र दायर गर्ने तयारी गरिरहेको छ। सम्पत्ति शुद्धीकरणको मुद्दामा ९० दिनको अनुसन्धान अवधि भएकाले पुस ५ सम्म आरोप पत्र दर्ता गरिनेछ। पूर्वडीआईजी छविलाल जोशी पक्राउ परेको मितिले पुस ५ मा ९० दिन पुग्ने भएकाले लामिछानेलाई पनि जोशी पक्राउ गरेको मितिबाट म्याद मिलाइएको हो।
लामिछानेलाई गत कार्तिक २ गते काठमाडौंबाट पक्राउ गरी पोखरा ल्याइएको थियो। यसबीच उनीमाथि कास्की, चितवन, पर्सा र काठमाडौं अदालतमा उपस्थित गराएर अनुसन्धान जारी राखिएको छ।
