समाचार सुन्नुहोस :
काठमाडौँ – साताको दोस्रो कारोबार दिन आज (सोमबार) पनि शेयर बजार उच्च अङ्कले घटेर राताम्मे भएको छ । सोमबार १५.६२ अंकले घट्दै बजार १९५८.७५ को बिन्दुमा झरेको छ । नेपाल स्टक एक्सचेन्जका अनुसार समग्रमा बजार ०.७९ प्रतिशतले घट्यो ।बजार घट्दा नेप्सेका सबैजसो सूचकहरु राताम्मे बने । विकास बैंकमा झिनो अंकले बृद्धि भएपनि अन्य सूचकहरुमा उच्च अंकले गिरावट आयो ।
स्टक एक्सचेन्जका अनुसार कारोबारमा आएका २४५ कम्पनीमध्ये १७७ कम्पनीको मूल्य घट्यो । ६२ कम्पनीको मूल्यमा भने सामान्य सुधार भएको स्टक एक्सचेन्जले जनाएको छ । निरन्तर ओरालोको बीच शेयर बजारमा कारोबार रकम पनि ह्वात्तै घटेको छ । निरन्तर तीन अर्ब माथि कारोबार भइरहेको बजारमा कारोबार रकम दुई अर्ब मुनि झरेको छ ।
सोमबार ६९ लाख ७८ हजार ३२१ कित्ता शेयर किनबेच हुँदा कारोबार रकम २ अर्ब ८९ करोड १३ लाख १९ हजार रुपैयाँ बराबरको भयो । जुन केही दिन यताकै कम रकम हो । यस दिन सिटिजन लाइफ इन्स्योरेन्स, नेपाल फाइनान्स, पोखरा फाइनान्सलगायतको कारोबार उच्च रहेको स्टक एक्सचेन्जले जनाएको छ ।
