काठमाडौं – क्रिकेटर शरद भेषावकरविरुद्ध उनकी पत्नी अभिनेत्री निशा अधिकारीले अदालतमा मुद्दा दायर गरेकी छन् । निशाले जिल्ला अदालत काठमाडौंमा अंश मुद्दा दायर गरेकी हुन् ।
आइतबार उक्त मुद्दामा सुनुवाई समेत भएको छ । न्यायाधीश कमलप्रसाद ज्ञवालीको इजलासले सुनुवाईपछि शरदको सम्पत्तिको फाँटबारी माग गर्न आदेश दिएको छ । शरदको सम्पत्ति विवरण प्राप्त भइसकेपछि अदालतले अंश मुद्दा टुंग्याउने छ । निशाले आफूसँगै छोराका लागि पनि अंश माग गरेकी छन् ।
केही वर्षको प्रेमपछि विवाहमा बाँधिएका यी चर्चित जोडीको सम्बन्ध ५ वर्षमै टुट्ने अवस्थामा पुगेको हो । उनीहरुले २०७४ असारमा विवाह गरेका थिए । २०७५ मा उनीहरुका एक छोरा जन्मिएका छन् । तर सन्तानका बाबुआमा भइसकेका उनीहरुको प्रेममा छोटो समयमै खटपट देखिएको हो ।
अंश मुद्दा दायर गरेकी निशाले सम्बन्ध विच्छेद गर्न भने चाहेकी छैनन् । निशाले अंश लिएर अलग बस्ने गरी मुद्दा दिएकी छन् । उनले सम्बन्ध विच्छेद गर्नका लागि सम्बन्ध विच्छेदकै मुद्दा दायर गर्नुपर्छ । सम्बन्ध विच्छेदको मुद्दा दिएको अवस्थामा भने अंशबण्डा पनि हुन्छ ।
