काठमाडौं – जजिरा एयरवेजले गौतम बुद्ध अन्तर्राष्ट्रिय विमानस्थल, भैरहवामा फागुन २५ गतेदेखि आफ्नो निर्धारित उडानहरू पुनः सुरू गर्ने भएको छ । जजिरा एयरवेजले फागुन २५ गतेदेखि भैरहवाबाट सातामा तीनवटा उडान गर्ने कम्पनीको भनाइ छ ।
जजिराले भैरहवाबाट कुवेतकोलागि मंगलबार, बिहीबार र शनिबार नेपाली समय अनुसार बिहान ८ बजेर ५ मिनेटमा उडान भर्नेछ भने कुवेतमा स्थानीय समयअनुसार बिहान १० बजेर ५५ मिनेटमा अवतरण गर्नेछ । साथै जजिरा एयरवेजले भैरहवादेखि कुवेतसम्म २८ हजार आठ सय ३६ रुपैयाँको विशेष प्रारम्भिक एकतर्फी उडानका भाडा कायम गरेको छ ।
नेपालस्थित जजिरा एयरवेजका जनरल सेल्स एजेन्ट तथा सोसाइटी इन्टरनेशनल ट्राभल सर्भिसेसका अध्यक्ष रविचन्द्र सिंहका अनुसार जजिराले नेपालको प्रबर्द्धनमा सहयोग पुर्याउने छ । उनले भने, ‘यसले गौतम बुद्ध अन्तर्राष्ट्रिय विमानस्थलमा अधिकतम आगमन सुनिश्चित गर्नुका साथै सम्पूर्ण पश्चिम भेगको पर्यटकीय परिस्थितिमा र राष्ट्रको समग्र आर्थिक वृद्धिमा सहयोग पुर्याउँछ भन्नेमा हामी विश्वस्त छौं ।’
