नागोया – जापानमा तेस्रो ठूलो सहर नागोयामा अविरल घिमिरे र जापनिज फुजीमुरा बिच बक्सिङ भिडन्तमा अविरल घिमिरेले सहजै जित हासिल गरेका छन् । आफूले कडा मेहनत गरेको र नेपालीको आर्सीवादले आफू विजयी भएको अविरलले बताएका छन् । प्रतियोगिता नागोया कंग्रेस हलमा आयोजना गरिएको थियो । अविरलले खेलेका हिट ४९को उक्त खेलमा पहिलो राउण्डमा नै जापनिज खेलाडी फुजीमुरा नकआउट गरेका थिए । ३-३ मिनेटमा ५ राउण्ड खेलिने उक्त खेल एक राउण्डमा नै सकिएको थियो ।
प्रतिस्पर्धा गरेका जापनिज फुजीमुरा जापानका राष्ट्रिय स्तरका खेलाडी हुन् । खेल हेर्न नेपाली तथा जापनिज दर्शकहरूको खचाखच उपस्थिति रहेको थियो । यसअघि पनि अधिकांश खेलमा अविरलले विजय हासिल गरेका थिए । यसपालि पनि अविरलले कडा मेहनत र नेपाली समुदायको सद्भाव र हौसला निरन्तर प्रदानले अविरलले विजय हासिल गरेको किक बक्सिङ प्रशिक्षक एवं अविरलका बुवा देव घिमिरेले बताए । अविरल मेरो मात्र नभई नेपालीकै छोरा हुन् , उसले नेपाल र नेपालीको इज्जत राखेकोमा खुशी लागेको उनले बताए ।
जापानमा हिमालयन चितुवाको नामले प्रख्यात अविरल घिमिरे बक्सिङ खेलको माध्यमद्वारा चम्कँदै गएका छन् । उनलाई मन पर्ने खेल किक बक्सिङ मार्फत उनको चर्चा बढिरहेको हो । उनलाई जापानमा नेपालीले मात्र होइन, जापनिजहरूले पनि चिन्न थालेका छन् । नेपाली युवा किक बक्सिङ खेलाडी अविरल घिमिरेले जापानमा पछिल्लो समय नयाँ इतिहास रचेका थिए । जापानको राजधानी टोकियोमा गत मार्च २८ तारिख भएको किक बक्सिङको विश्व चर्चित के वन भिडन्तमा जापानी खेलाडीलाई नकआउट गर्दै अविरलले जित हात पारेका थिए । नेपाली खेलाडीले किक बक्सिङ के वन खेलमा जित निकालेको यो पहिलोपटक थियो । हिमालयन चितुवाको नामले परिचय स्थापित गरेका अविरल घिमिरेले जापानको राष्ट्रिय स्तरको ‘के फेस्टा’ अर्थात् ‘के वन प्रतियोगितामा चर्चित जापानी किक बक्सर कोतेचुलाई हराएका थिए ।
अविरल २१ वर्षको उमेरमै अन्तर्राष्ट्रिय स्तरको किक बक्सिङ टुर्नामेन्ट खेल्ने पहिलो नेपाली युवा खेलाडी समेत हुन् । अविरलले खेलेका हिट ४७ व्यावसायिक किक बक्सिङ सहित १५ खेल मध्ये ११ वटामा ( नकआउट ) निकालेका थिए । उनले ३ वटामा हार व्यहोरेका थिए भने १ वटा प्रतिस्पर्धात्मक खेलमा उनी विजयी भएका थिए ।
अविरलले नियमित रूपमा सिमुरा डोजोमा प्रशिक्षण लिँदै आएका छन् । आफ्नो आमाबुबासँग जापानको नागोया सहरमा बस्दै आएका अविरल घिमिरेलाई उनको मनपर्ने खेल बक्सिङमा अहिलेसम्म सफलता हात परिरहेको छ। करिब ६ वर्ष जापान बसाइँका क्रममा अविरल लाई निरन्तर सफलता मिलिरहेको बुबा तथा उनको बक्सिङ खेलका कोच (प्रशिक्षक) देव घिमिरे को भनाई छ । बुवाकै प्रेरणाबाट आफू यस खेलमा लागेको अविरल बताउँछन् । उनका बुवा देव घिमिरे नेपालका मार्शलआर्टका पूर्व राष्ट्रिय खेलाडी समेत हुन् । साथै देव घिमिरेले पनि सन् २००४ मा के वन ग्राण्ड प्रिक्स भिडन्त गरेका थिए ।
