काठमाडौं – नेपाली टोलीबाट मुख्य प्रशिक्षक अब्दुल्लाह अलमुताइरीले साफ च्याम्पियनसिपको फाइनल नेपाली टिमको प्रशिक्षकको रूपमा आफ्नो अन्तिम खेल हुने बताएका छन् ।
बङ्गलादेशविरुद्धको खेल १-१ गोलको बराबरी खेल्दै नेपाली टिमलाई फाइनलमा पुर्याएपछि आयोजित पत्रकार सम्मेलनमा बोल्दै फाइनल खेल नेपालको प्रशिक्षकको रूपमा अन्तिम खेल हुने बताउँदै आफू अब नेपाल नफर्किने पनि बताएका हुन् ।
नेपाली मिडियाले आफ्नो नामको दुरुपयोग गरेको आरोप लगाउँदै प्रशिक्षक अलमुताइरीले आफूले प्रशिक्षकको पद छोड्ने बताएका छन् । उनले भने- ‘पछिल्लो तीन दिन मेरो लागि तनावपूर्ण भयो । केही पत्रकारले मेरो नाममा पैसा बनाइरहेका छन् । हामीले इतिहास बनाएका छौँ । फाइनल खेल मेरो नेपाली राष्ट्रिय टिमसँग अन्तिम खेल हुने छ ।’
भारतविरुद्धको खेलमा बढी डिफेन्सिभ खेलेको भन्दै उनको आलोचना पनि भएको थियो । यसअघि पनि प्रशिक्षक अलमुताइरी एन्फाका पदाधिकारीसँग विवादमा परेका थिए ।
