पूर्वफिफा रेफ्री लव खत्रीको निधन

काठमाडाैं – पूर्वफिफा रेफ्री लव खत्रीको निधन भएको छ । उनी ५० वर्षका थिए । रेफ्री एसोसियसन अफ नेपालका महासचिवसमेत रहेका खत्री सोमबार बिहान घरको बाथरुममा लडेका थिए ।

अखिल नेपाल फुटबल सङ्घ(एन्फा) का अनुसार उनलाई तत्काल मेडिसिटी अस्पताल लगिए पनि चिकित्सकले मृत घोषणा गरेका थिए । सन् २०१८ मा रेफ्रीबाट संन्यास लिएपछि उनी रेफ्री प्रशिक्षकका रूपमा काम गर्दै आएका थिए ।

१२:१० बजेदेखि एन्फा प्राङ्गणमा श्रद्धाञ्जलीका लागि खत्रीको शव राखिने एन्फाले जनाएको छ । उनको आजै अन्तिम संस्कार गरिनेछ । खत्रीका पत्नी र एक छोरा रहेका छन् ।