काठमाडाैं – जापानको टोकियोमा जारी पाराल्याम्पिकमा नेपाली खेलाडी पलेशा गोवर्द्धन रिपेचेज तर्फको फाइनलमा पराजित हुँदै कास्य पदक जित्न चुकेकी छन् ।
के-४४ विधा अन्तर्गत महिला ५८ केजीमुनि तौल समूहमा प्रतिस्पर्धा गरेकी उनले शुक्रबार कास्य पदकका लागि भएको निकै प्रतिस्पर्धात्मक खेलमा चीनकी युजी लीसँग १२-९ को पराजय बेहोरिन् । पहिलो राउन्ड ४-२ ले आफ्नो पक्षमा पारेकी पलेशा दोस्रो राउन्डमा ५-० पराजित भइन् । तेस्रो राउन्ड ५-५ को बराबरीमा सकिएपछि उनी कास्य जित्नबाट चुकेकी हुन् ।
पहिलो खेलमा बेलायतकी बेथ मुनरोसँग २१-८ ले पराजित हुँदै स्वर्ण जित्ने अवसर गुमाएकी पलेशाले रिपेचेज तर्फको क्वाटरफाइनलमा अमेरिकाकी ब्रायना सालिनारोलाई १०-० र सेमिफाइनलमा सर्बियाकी मारिया मिसेभलाई २३-१५ ले जित हराउँदै फाइनल प्रवेश गरेकी थिइन् । वाईल्ड कार्डमार्फत सहभागिता जनाउने अवसर पाएकी पलेशा टोकियो पाराल्याम्पिक खेल्ने एक्लो नेपाली खेलाडी हुन् ।
