काठमाडाैं – भारतीय फुटबल कप्तान सुनील क्षेत्रीले आफू नेपाल आउँदा मामाघर आएको जस्तो लागेको बताएका छन् । यसअघि त्रिभुवन विमानस्थलमा आउँदा पनि उनले आफू आमाको माइती वा हजुरआमाको घर आएको भन्दै नेपालप्रति आफ्नो आत्मीयता दर्शाएका थिए ।
बिहीबार र आइतबार नेपाल र भारतबीच हुने मैत्रीपूर्ण खेलका लागि भारतीय फुटबल टिमको नेतृत्व गरेर सुनील नेपाल आएका हुन् । बुधबार काठमाडौंमा आयोजना भएको प्रिम्याच कन्फ्रेन्समा पनि सुनीलले फेरि नेपालसँगको आफ्नो भावानात्मक सम्बन्धबारे सम्झिए ।
उनले बुधबार चाहिँ नेपालीमा नै सक्दो जवाफ दिने प्रयास गरे । अनि काठमाडौं आउँदा मामाघर आएको जस्तो आफूलाई लागेको बताए । सुनीलले आफूले पूरै नेपाली बुझ्ने मात्र होइन, जवाफ पनि नेपालीमा नै दिने प्रयास गरेका थिए । नेपाली पत्रकारहरुले उनलाई प्रश्न गरेका थिए- नेपालीमा सोध्दा हुन्छ ? ‘हुन्छ, मैले जति जानेको छु, त्यति नेपालीमा उत्तर दिनेछु,’ सुनीले हाँस्दै जवाफ दिए ।
मैत्रीपूर्ण प्रतिस्पर्धा भोली
नेपाल र भारतले ६ वर्षपछि एक आपसमा खेल्न लागेका हुन् । दुवै टिमले यो दुई खेललाई साफको तयारीका रुपमा लिएका छन् । नेपालले भारतसँग बिहीबार पहिलो मैत्रीपूर्ण खेल खेल्नेछ । त्रिपुरेश्वरस्थित दशरथ रंगशालामा हुने मैत्रीपूर्ण खेल ५:३० बजे सुरु हुनेछ । यस्तै नेपालले भारतसँग दोस्रो खेल आइतबार खेल्नेछ ।
माल्दिभ्समा आयोजना हुने साफ च्याम्पियनसिपको तयारीका लागि नेपाल र भारतले मैत्रीपूर्ण खेल खेल्न लागेको हो । साफ च्याम्पियनसिप अक्टोबर १ देखि १६ (असोज १५ देखि ३०) गतेसम्म आयोजना हुनेछ ।
