प्रिमियर लिग : सानदार जितसँगै वेस्ट ह्याम शीर्ष स्थानमा

काठमाडौं — इंग्लिस प्रिमियर लिग अन्तर्गत सोमबार राति भएको खेलमा वेस्ट ह्याम युनाइटेड विजयी भएको छ । उसले घरेलु मैदानमा १० खेलाडीमा सीमित लेस्टर सिटीमाथि ४-१ को सहज जित दर्ता गरेको हो ।

खेलको २६औँ मिनेटमा पाब्लो फोर्नल्सले घरेलु टोलीलाई अग्रता दिलाएका थिए । खेलको ४०औँ मिनेटमा आयोज पेरेजले रातो कार्ड बेहोरेपछि लेस्टर १० खेलाडीमा सीमित बन्यो ।

खेलकाे ५६औँ मिनेटमा मोहम्मद बेन्नह्माले वेस्ट ह्यामको अग्रतालाई दोब्बर बनाए । ६९ औँ मिनेटमा युरी टेलीमन्सले गोल गर्दै लेस्टरलाई २-१ को स्थितिमा ल्याए।

खेलको ८० र ८४औँ मिनेटमा माइकल एन्टोनियोले गोल गर्दै टोलीलाई ४-१ को सानदार जित दिलाए ।

लगातार दोस्रो जित निकालेको वेस्ट ह्याम २ खेलबाट ६ अंकका साथ लिगको शीर्ष स्थानमा उक्लिँदा समान खेलबाट ३ अंक जोडेको लेस्टर १२औँ स्थानमा छ।