जोकोभिच टोकियो ओलम्पिकको सेमिफाइनलमा पराजित

काठमाडौं – नोभाक जोकोभिच टोकियो ओलम्पिकको पुरुष सिंगल टेनिसको सेमिफाइनलमा पराजित भएका छन् । शुक्रबार भएको सेमिफाइनल खेलमा विश्व वरियतामा शीर्ष स्थानमा रहेका जोकोविच जर्मनी खेलाडी एलेक्जेन्डर जेरेभसँग २-१ सेटमा पराजित भएका हुन् ।

पहिलो सेट ६-१ ले जितेको जोकोविचले पछिल्ला दुई सेट ६-३ र ६-१ ले गुमाएका थिए । योसंगै जेरेभ ओलम्पिकको पुरुष सिंगलको फाइनलमा पुगेका छन् भने उनले स्वर्ण पदकका लागि आइतबार रसियाका खाचानोभ कारेनसँग प्रतिष्पर्धा गर्ने छन् ।

यससँगै जोकोभिचको गोल्डेन स्लाम जित्ने लक्ष्य समाप्त भएको छ । एकै वर्ष चार ग्राण्डस्लाम र ओलम्पिकमा स्वर्ण पदक जित्नुलाई टेनिसमा गोल्डेन स्लाम भनिन्छ । अहिलेसम्म कुनै पनि पुरुष खेलाडीले यो सफलता हासिल गरेका छैनन् । जोकोभिचले विम्बल्डन, अस्ट्रेलियन र फ्रेन्च ओपनको उपाधि जितिसकेका छन् ।