टोयोटा- जापानको औद्योगिक नगरी टोयोटामा जापान भर रहेका नेपाली टिमहरुको फुटबल प्रतियोगिता सम्पन्न भएको छ । व्यस्त शहर टोयोटामा ‘दियालो सेभेन ए साईट फुटबल रनिङ्ग कप-२०२१’ सफलतापूर्वक सम्पन्न भएको हो ।
खेलको धरान एफसीले आयोजना गरेको हो । प्रतियोगितामा जापान भरबाट १६ टिमले भाग लिएका थिए । सहभागी टिमहरुमा एफसी धरान ब्ल्यक, एभ्रेष्ट एफसी, सिजिओका ब्ल्याक, वेनि एफसी, एनएन एफसी, ओशाका ब्रदर्श, काभ्रेली समाज, कोवे युनाईटेड, एफसी धरान वाईट सहभागी थिए । अन्य टिमहरुमा फुकुओका एफसी, पोखरा एफसी, सिजुओका गाईज, सिजुओका ग्रे, योक्काईची एफसी सि, एफसी धरान येल्लो, युनिटि एफसी सहभागी थिए ।
प्रतियोगितामा सिजुओका गाईज सिजुओका प्रथम भयो भने एनएनएसी नागोयाले दोश्रो स्थान प्राप्त गर्यो । फाईनल खेल निकै प्रतिप्रर्धात्मक रहेको थियो । खेल टाइब्रेकरमा ३-२ गोल अन्तरले विजेता तय भएको थियो । खेलको विजेताले २ लाख ५२ हजार ५२५ येन नगद, ट्रफि तथा प्रमाणपत्र र उपविजेताले १ लाख ५१ हजार ५१५ येन नगद, ट्रफि तथा प्रमाणपत्र प्राप्त गरे ।
खेलमा उत्कृष्ट खेलाडी एनएनएफसीका अनिल गुरुङ्ग भए भने म्यान अफ दि म्याच एनएनएफसीकै रोशन गुरुङ्ग घोषित भए । हाई स्कोरर सिजुओका गाईजका साजन प्रधान भए भने वेष्ट गोलकिपर सिजुओकाकै विवेक थापा भएका थिए ।
अग्रजलाई सम्मान स्वरूप ३५ वर्ष पार गरेका एनआरएनए भेट्रान र नागोया भेट्रानको मैत्रीपूर्ण खेलसमेत आयोजना भएको थियो । प्रतियोगितामा एनआरएनए नागोयाले नागोया भेट्रानलाई ३-२ गोलले पराजित गरेको थियो । एनआरएनए टिमका क्याप्टेनसमेत रहेका एनआरएनए जापानका सल्लाहकार विमल अधिकारीले आफूले आफ्नो टिमकोतर्फ बाट २ गोल गर्न सफल भएको बताउँदै प्रतियोगिता आयोजना गर्ने आयोजकलाई धन्यवाद दिएका छन् । जापान जस्तो व्यस्त देशमा पनि समय निकालेर यति ठूलो आयोजना गर्नु सानो कुरो नभएको उनको भनाई छ ।
प्रतियोगिताको समुद्घाटन समारोह नेपालकै पूर्व किक वक्सिङ्ग खेलाडी एवं प्रशिक्षक देव घिमिरेको र समापन कार्यक्रम एनआरएनए जापानका उपाध्यक्ष दिपक कार्कीको प्रमुख आतिथ्यतामा सम्पन्न भएको थियो । कार्यक्रममा जापानका विभिन्न संघ संस्थामा रहेका नेत्तृत्व तथा प्रतिनिधिहरुको उपस्थिति थियो ।
प्रतियोगिता हेर्न जापान भरिबाट उल्लेखनिय नेपाली अनि जापनिजहरुको उपस्थिति रहेको थियो । यस खालको प्रतियोगिता प्रत्येक दुई वर्षमा आयोजना गर्ने लक्ष्य लिएको खेल संयोजक तथा धरान एफसीका उपाध्यक्ष सबिन राईले बताए । खेल सम्पन्न गर्नका लागि सहयोग गर्नु हुने सम्पूर्ण व्यक्ति तथा संघ/संस्थालाई धरान एफसीका अध्यक्ष योमन देवानले धन्यवाद ज्ञापन गरे । ‘सबैको साथ सहयोग रहेर प्रतियोगिता सफलतापूर्वक सम्पन्न हुन सक्यो,’ उनले भने ।
तपाईको प्रतिक्रिया
सम्बन्धित समाचार
