जुडोकी सोनियाले टोकियो ओलम्पिक खेल्ने पक्का

काठमाडौं – जुडोकी सोनिया भट्ट अर्को महिनाबाट सुरु हुने टोकियो ओलम्पिकका लागि छनोट भएकी छन् । सोनियाले वाइल्ड कार्ड प्राप्त गर्दै ओलम्पिकमा नेपालको प्रतिनिधित्व गर्ने निश्चित भएको नेपाल ओलम्पिक कमिटीले बताएको छ ।

आठौँ राष्ट्रिय प्रतियोगितामा स्वर्ण तथा नेपालमै सम्पन्न १३औँ दक्षिण एसियाली खेलकुद (साग) मा कास्य पदक विजेता सोनिया वाइल्ड कार्ड प्राप्त गर्ने दोस्रो नेपाली खेलाडी हुन् । यसअघि सुटिङकी कल्पना परियारले वाइल्ड कार्ड प्राप्त गरेकी थिइन् ।

योसँगै जुलाई २३ देखि अगस्ट ८ सम्म जापानको टोकियोमा हुने ओलम्पिकका लागि छनोट हुने नेपाली खेलाडीको संख्या ५ पुगेको छ । यी दुईसहित पौडीकी गौरिका सिंह र एलेक्स शाह तथा म्याराथनका गोपिचन्द पार्कीले ओलम्पिक खेल्ने पक्का भएको हो ।