रोनाल्डोबिनाको खेलमा पोर्चुगलको सहज जित

काठमाडौँ – कप्तान क्रिस्टियानो रोनाल्डो बिना मैदानमा उत्रिएको पोर्चुगलले बुधबार राति नेशन्स लिग फुटबलमा शानदार जित दर्ता गरेको छ ।  गएरातिको खेलमा पोर्चुगलले स्वीडेनमाथि ३–० को जित दर्ता गरेको हो ।

कोरोना भाइरस (कोभिड–१९) संक्रमण पुष्टि भएपछि रोनाल्डो आइसोलेशनमा छन् । कप्तान रोनाल्डो बिना मैदान उत्रिएको पोर्चुगलले शानदार जित दर्ता गरेको हो ।​

पोर्चुगलको जितका लागि बर्नार्डो सिल्भा र डिएगो जोटाले गोल गरे । सिल्भाले खेलको २१ औं मिनेटमा पोर्चुगललाई अग्रता दिलाएका थिए ।

दोस्रो गोल पहिलो हाफको एक मिनेट अघि जेटाले गरेर अग्रता दोब्बर बनाए । खेलको ७२ औं मिनेटमा विलियन कार्भाल्होको पासलाई सदुपयोग गर्दै जेटाले नै पोर्चुगललाई ३–० को जित दिलाएका हुन् ।

नेशन्स लिग अन्तर्गत ए थ्रीमा रहेको पोर्चुगल १० अंकसहित समूहको शीर्ष स्थानमा छ । स्वीडेन अंकबिहीन छ।