काठमाडौं – विश्वमा एकै दिन तीन बढी कोरोना संक्रमित थपिइरहेका बेला रुसले कोरोना भाइरस संक्रमितको उपचारका लागि अर्काे एउटा एन्टिभाइरल औषधि तयार गरेको छ ।
रुसले हल्का लक्षणवाला संक्रमितका लागि प्रयोग गरिने कोरोनाभिर औषधि बनाएको हो । कोरोनाका बिरामीमा यो औषधि प्रयोगका लागि त्यहाँको औषधि नियामक निकायले अनुमति दिएको बीबीसीले जनाएको छ ।
आर-फार्म कम्पनीले बनाएको उक्त औषधि आगामी हप्ता रुसका बजारमा उपलब्ध हुने जानकारी शुक्रबार कम्पनीले दिएको छ । यसअघि मेमा रुसमा एक अर्काे औषधि एभिफाभिर नामको औषधिलाई कोरोना संक्रमितमा प्रयोगका लागि अनुमति दिइएको थियो ।
समाचार एजेन्सी रोयटर्सका अनुसार यी दुवै औषधि जापानमा विकास गरिएको फेभिपिभिर औषधिको सूत्रमा आधारित छन् । फेभिपिरभिर एक एन्टिभाइरल औषधि हो, जुन जापानमा फ्लु र भाइरस संक्रमणको उपचारमा प्रयोग गरिन्छ ।
आर–फार्मा कम्पनीका अनुसार १६८ जनामा तेस्रो चरणको क्लिनिकल परीक्षणपछि कोरोनाभिर औषधिले अनुमति पाएको हो । रुस सरकारको एक रिपोर्टअनुसार यसअघि कोरोनाभिर गत जुलाईमा अस्पतालमा भर्ना भएका बिरामीमा प्रयोगका लागि अनुमति प्राप्त भएको थियो ।
जानकारका अनुसार रुस कोरोनाविरुद्धका खोप एवं औषधि विकासको दौडमा विश्वकै पहिलो हुन चाहन्छ । यसअघि रुसले कोरोनाविरुद्ध स्पुतनिक-५ बनाइसकेको छ । जुन खोपलाई अन्य देशमा पनि प्रयोगका लागि अनुमति दिलाउने प्रयास उसले गरिरेहको छ । रुसमा बनेको खोप भारतमा ल्याउने तयारी पनि भइरहेको बीबीसीले जनाएको छ । –एजेन्सी
