मृत्यु भइसकेका व्यक्तिको कोरोना परीक्षण नगर्न निर्देशन

काठमाडौं – सरकारले मृत्यु भइसकेका व्यक्तिको शवबाट स्वाब निकालेर कोरोना परीक्षण नगर्न निर्देशन दिएको छ । स्वास्थ्य तथा जनसंख्या मन्त्रालयका प्रवक्ता जागेश्वर गौतमले बुधबार नियमित मिडिया ब्रिफिङमा बोल्दै मृत्यु भइसकेका व्यक्तिहरूको कोरोना परीक्षण नगर्ने निर्णय भएको जानकारी दिए ।

मन्त्रालयको इन्सिडेन्ट कमाण्ड सिस्टमको बैठकले शंकास्पद व्यक्तिको मृत्युपछि कोरोना परीक्षण नगर्ने निर्णय गरेको जानकारी गराउँदै प्रवक्ता गौतमले  बरु शव व्यवस्थापन गर्दा स्वास्थ्य सावधानी अपनाउनु पर्ने र सम्पर्कमा आएका व्यक्तिहरू १४ दिन क्वारेन्टिनमा बस्नुपर्ने बताए ।

यसअघि कोरोना भाइरस संक्रमणसँग मिल्ने लक्षण भएका व्यक्तिको मृत्युभएपछि मृतकको स्वाब संकलन गरेर परीक्षण गर्ने गरिएको थियो। प्रवक्ता गौतमले यससम्बन्धी निर्देशिका परिमार्जन गर्दै लैजाने  जानकारी समेत गराए ।