काठमाडौं – नेपाल भ्रमणमा रहेकी मिस वर्ल्ड टोनी एन सिंह मकवानपुरको कैलाश गाउँपालिका ७ तामलाङ गाउँ पुगेकी छन् । तामलाङस्थित ङिको स्वास्थ्य चौकीको अवलोकनका लागि सिंह, मिस वर्ल्डकी अध्यक्ष जुलिया मोर्ले, मिस नेपाल २०१८ श्रृंखला खतिवडा, मिस नेपाल २०१९ अनुष्का श्रेष्ठ र मिस नेपालका आयोजकहरु पुगेका हुन् ।
पाहुनाहरु तामलाङ पुग्दा स्थानीय वासिन्दाले भव्य स्वागत गरेका थिए । तामलाङस्थित ङिको स्वास्थ्य चौकी मिस नेपाल २०१८ कि विजेता श्रृंखला खतिवडाले बनाइदिएकी हुन् । स्वाथ्यचौकी अवलोकनपछि मिस वर्ल्डकी अध्यक्ष मोर्लेले बर्थिङ सेन्टर चलाउन आर्थिक सहयोग गर्ने प्रतिबद्धता जनाएको बागमती प्रदेश सांसद एवं खतिवडाकी आमा मुनु सिग्देलले जानकारी दिइन् ।
कैलाश गाउँपालिकाले आयोजना गरेको स्वागत कार्यक्रममा मिस वर्ल्डकी अध्यक्ष मोर्लेले २०१८ को मिस वल्र्डमा ब्युटी विथ पर्पज जित्न सफल भएको स्थानमा पुग्न र देख्न पाएकामा खुसी व्यक्त गरिन् । कार्यक्रममा बागमती प्रदेश सांसद सिग्देल, हेटौँडा उपमहानगरपालिकाकी उपमेयर मीनाकुमारी लामा, कैलाश गाउँपालिका अध्यक्ष टंकबहादुर मुक्तान, उपाध्यक्ष सुकुमाया थिङ, मनहरी गाउँपालिका अध्यक्ष एकराज उप्रेती, उपाध्यक्ष मनिला बिष्ट लगायत जनप्रतिनिधि र सुरक्षाकर्मीहरुको सहभागिता रहेको थियो ।
तपाईको प्रतिक्रिया
सम्बन्धित समाचार
