काठमाडौँ – चीनको वुहानबाट फैलिएको नोवलकोरोना भाइरस संक्रमणका कारण हङकङमा एकजनाको मृत्यु भएको छ ।
हङकङमा पहिलोपटक एकजनाको मृत्यु भएको साउथ चाइना मर्निङ पोस्टले जनाएको छ । हङकङको प्रिन्सेर मार्गरेट अस्पतालमा उपचाररत ३९ वर्षीय एकजनाको मंगलबार मृत्यु भएको हो ।
उनी हङकङमा १३ औं संक्रमित थिए । उनी जनवरी २१ मा वुहान गएको र दुई दिनपछि हङकङ फर्किएका थिए । सोही दिन उनलाई क्वीन एलाजेवेथ अस्पतालमा परीक्षणका क्रममा कोरोनाको संक्रमण भेटिएको थियो ।
मृतक ती व्यक्ति वाम्पाओ गार्डेनमा आफ्नी आमासँग बस्दै आएका थिए । उनलाई पनि फेब्रुअरी २ मा कोरोनाको संक्रमण भएको पुष्टि गरिएको छ ।
चीनमा अहिलेसम्म ४२५ जना, फिलिपिन्समा एकजनाको मृत्यु भएको छ । त्यसैगरी अहिलेसम्म विश्वभर २० हजारभन्दा बढी कोरोनाको संक्रमण भएको पाइएको छ ।
