काठमाडौं – माघ १८ मा रिलिज हुने रणवीरको पहिलो गीत सार्वजनिक गरिएको छ । शनिवार राजधानीमा एक पत्रकार भेटघाटको आयोजना गर्दै फिल्ममा समावेश ’तिरिमिरी तिरिमिरी तिन तारा’ बोलको गीत सार्वजनिक गरिएको हो ।
सार्वजनिक गीतमा राजन राज सिवाकोटी र अन्जु पन्तको स्वर रहेको छ भने यसमा शब्द र सङ्गीत स्वयम् राजनले नै दिएका छन् । केही दिन अगाडी नक्सालको बालमन्दिरमा भव्य सेट लगाएर छायाङ्कन गरिएको गीतलाई रामजी लामिछानेको कोरियोग्राफी गरेका हुन् ।
गीतमा फिल्मका तिन मुख्य कलाकार सुशील सिटौला र डेब्यु गर्ल शुभेच्छा खड्का र सुपुसा भट्ट नेपाली पहिरनमा देखिएका छन् ।
निर्माण पक्षको अनुसार यस गीतको छायाङ्कन झन्डै ४ दिन गरिएको हो भने एक सय पचास भन्दा बढी कोरस प्रयोग गरिएको गीतमा २५ लाख लागत रहेको छ । लभ स्टोरीमा निर्मित फिल्ममा सुशील , सुभेच्छा र सुपुस्पासँगै प्रशान्त ताम्राकार , रवि गिरी, हरिहर शर्मा, नरेश पौडेल लगायतका कलाकारको अभिनय रहेको छ ।
यसमा कथा , पटकथा , संवाद तथा निर्देशन गोविन्द सिंह भण्डारीको रहेको छ । फिल्ममा महेश पौडेलको छायांकन, कृष्ण भण्डारीको सम्पादन, चन्द्र पन्तको द्वन्द, रामजी लामिछाने र सुरेन्द्र बसेलको कोरियोग्राफी छ ।
