काठमाडौं – कमेडी फिल्म ‘साली कसको भेनाको’मा समावेश ‘माया तिमी’लाई बोलको रोमान्टिक गीत सार्वजनिक गरिएको छ । भद्र भुजेलको निर्देशनमा बनेको फिल्मको हालै राजधानीमा प्रेसमिट गरी दुई गीत र ट्रेलर देखाइएको हो ।
भदौ २९ गतेदेखि प्रदर्शन हुने फिल्ममा विल्सनविक्रम राई, बुद्धि तामाङ, मरिष्का पोखरेल, रजनी गुरुङ, जयनन्द लामा, सुषमा कार्की, कविता आले, रवि गिरी, पुष्प आचार्यका साथमा नवनायक देव सागरले अभिनय गरेका छन् ।
पहिला ‘कान्छी’, ‘सन्तान’ र ‘कर्जा’ फिल्म निर्माण गरेका निर्माता तथा संगीतकार प्रसाद श्रेष्ठको प्रस्तुति रहेको फिल्मको निर्मातामा रामप्रसाद श्रेष्ठ, सुशीलगोपाल न्याछ्यो, काजीमान श्रेष्ठ विशाल, कमला भट्टराई र मुक्ति अधिकारी छन् ।
मुभिङ पिक्चर्सको ब्यानरमा निर्माण भएको फिल्मको स्क्रिप्ट पुष्प आचार्यले लेखेका हुन् । फिल्मका गीतमा प्रसाद श्रेष्ठ, सुरज शाही ठकुरी र मीन घलानको संगीत छ । भरपुर मनोरञ्जक फिल्म भएकाले आफू निकै आशावादी रहेको प्रसाद बताउँछन् ।
गाउँले परिवेशको मौलिक कथामा आधारित फिल्म आमदर्शकलाई मन पर्ने तर्क निर्देशक भुजेलको छ । फिल्ममा समावेश ‘ढलढल ढल्काउली’ बोलको गीत केही दिनपछि दर्शकमाझ ल्याइने निर्माण पक्षले जानकारी दिएको छ । सो गीतमा ‘साली कसको भेनाको’का अधिकांश कलाकारले नृत्य गरेका छन् ।
