टोकियो–काम गर्ने उद्देश्यले नक्कली शरणार्थी आवेदन दिनेहरूको संख्या बढेसँगै जापानको न्याय मन्त्रालयले शरणार्थी सम्बन्धी नयाँ नियम यही नोभेम्बर महिनाको मध्यतिरबाट पूर्णरुपमा लागू गर्ने जापानका संचार माध्यमहरुले समाचार प्रकाशित गरेका छन् ।
यस नियम लागू भएसँगै काम गर्ने उद्देश्यले नक्कली शरणार्थी आवेदन दिनेहरूको संख्या घट्न सक्ने बताइएको छ । हालसम्मको नियम अनुसार आवेदन दिएको ६ महिनापछि काम गर्ने अनुमति प्राप्त गर्दै आएकोमा अब भने आवेदकहरूलाइ चार वर्गमा विभाजन गरी शरणार्थी आवेदन दिने सक्कली या नक्कली भनेर २ महिनाभित्र नै छानविन हुने बताइएको छ ।
पैसा कमाउने उदेश्यका साथ विद्यार्थी, प्रशिक्षार्थी तथा अन्य भिषा त्याग गरी नक्कली शरणार्थी बन्ने क्रम बढेसँगै जापान सरकारले यो नीति लिएको बुझिएको छ । काम गर्ने उद्देश्यले आवेदन दिएका नक्कली आवेदकहरूलाइ जापानको १७ स्थानमा रहेको इमिग्रेसनको बन्दी गृहमा राखिने पनि बताएको छ ।
अहिले शरणार्थी छानविनको काम औसत १० महिना बढि समय लाग्दै आइरहेको थियो । शरणार्थी आवेदकहरूको अवस्था हेर्दा सम्भावित आवेदकहरू मध्ये एक प्रतिशत भन्दा कम वास्तविक शरणार्थी हुनसक्ने अनुमान गरिएको छ । वास्तविक शरणार्थी हुनसक्ने सम्भावित आवेदकहरूलाइ भने आवेदन दिएको ६ महिना नपुगे पनि काम गर्न अनुमति दिने बताइएको छ ।
पछिल्लो तथ्यांक अनुसार जापानमा शरणार्थी आवेदन दिनेहरुमध्ये नेपालीहरुको संख्या दोस्रो स्थानमा रहेको थियो । नयाँ नियम लागू पश्चात धेरै नेपालीहरु पनि यस नियमबाट प्रभावित हुनसक्ने जानकारहरु बनाउँछन् ।