हरेक दिन खाली पेटमा मनतातो पानीमा कागती निचोरेर पिउँदा निकै लाभदायक हुने विज्ञहरूले सुझाब दिएका छन् । कागतीपानीमा भिटामिन, मिनरल्स र फाइबरको मात्रा पर्याप्त हुन्छ । विभिन्न रिसर्चका आधारमा युएस डिपार्टमेन्ट अफ एग्रिकल्चरले दिनहुँ खाली पेटमा मनतातो कागतीपानी पिउनुका फाइदाबारे जानकारी दिएको छ :
कागतीमा पाइने फाइबर, साइट्रिक एसिड र पानी एकसाथ मिल्दा शरीरको बोसो काट्न भूमिका खेल्छ । नियमित खाली पेटमा कागतीपानी पिउनाले तौल घटाउन सघाउ पुग्छ ।एन्टिअक्सिडेन्ट र एल्कलाइन गुणको स्रोत कागतीपानी भएकाले कैैफिनयुक्त अन्य ड्रिंक्सको तुलनामा धेरै इनर्जी दिन्छ । बडी सेल्सलाई दिनभर ऊर्जाशील राख्न सघाउ गर्छ ।
कागतीपानीले शरीरमा मेटाबोलिजम बढाउँछ । शरीरमा पाचन रस पनि धेरै पैदा गर्छ । यसमा पाइने डायटरी फाइबर्सले पाचन क्रिया सहज बनाउँछ । शरीरभित्र जमेर रहेको हानिकारक पदार्थ निष्कासन गर्न पनि भूमिका खेल्छ ।
एक कप कागतीपानीमा बढीमा २० क्यालोरी हुन्छ । यसले शरीरमा एक्स्ट्रा क्यालोरी जम्मा हुन पनि दिँदैन । यसमा हुने डायटरी फाइबर्स, साइट्रिक एसिड र शक्तिशाली एन्टिअक्सिडेन्टले कोलेस्ट्रोल बाहिर निकालिदिन्छ ।
कागतीपानीमा हुने एन्टिब्याक्टेरियल तत्वले मुखको ब्याक्टेरिया मार्छ र श्वासको गन्ध हटाउँछ । यसमा हुने भिटामिन सीले रोग प्रतिरोधात्मक क्षमता बढाउने तथा रुघाखोकी र फ्लुबाट बचाउने गर्छ । क्याल्सियमले दाँत बलियो बनाउँछ ।
आइरन र भिटामिन सी प्रचुर मात्रामा हुने भएकाले कागतीपानीले दिमागमा अक्सिजनको सञ्चार सहज गराउँछ । मनतातो कागतीपानीले घाँटीको खसखस हटाउँछ । यसमा हुने भिटामिन सी र अल्काइन पावरले कफ निकाल्छ ।
कागतीपानीमा पाइने पोटासियम, म्याग्नेसियम, फाइबर र एन्टिअक्सिडेन्टले शारीरिक पीडा कम गर्छ । यसले शरीरको युरिक एसिड पनि बाहिर निकाल्छ । जोर्नीको दुखाइ पनि कम गराउँछ । कागतीमा पाइने बी–६ ले खानालाई शक्तिमा बदल्न मद्दत गर्छ । मेटाबोलिजम प्रक्रियालाई पनि दु्रत पार्छ ।
