काठमाडौं – स्वास्थ्यमन्त्री गगनकुमार थापाले स्वास्थ्य मन्त्रालयमा रहँदा थुप्रै काम सुरु गरेको भन्दै पुनः सोही मन्त्रालयमा आउन चाहेको बताउनु भएको छ । आफ्नो साढे नौ महिने कार्यकालमा गरेका कामहरुका बारेमा जानकारी दिन आज आयोजित पत्रकार सम्मेलनमा उहाँले उक्त इच्छा ब्यक्त गर्नु भएको हो ।
उहाँले अहिले गरेको कामको कार्यान्वयन र अरु बाँकी थुप्रै काम अगाडि बढाउन पनि स्वास्थ्य मन्त्रालय आउन चाहेको खुलासा गर्नुभयो । थापा २०७३ भदौ ११ गते स्वास्थ्य मन्त्री हुनु भएको थियो । उहाँले स्वास्थ्य मन्त्रालयद्वारा हाल चालिएका कदमहरुले निरन्तरता पाए सबै नेपालीले गुणस्तरीय स्वास्थ्य उपचारमा पहुँच पाउनेसमेत दावी गर्नुभयो ।
आफ्नो कार्यकालमा स्वास्थ्य सेवालाई राष्ट्रिय मुद्दाको स्थापित गरेको उल्लेख गर्दै उहाँले आफ्नो कार्यकालमा संघीय संरचनामा स्वास्थ्य सेवा र संरचनाको खाका निर्माण, संविधानले मार्गनिर्देश गरे अनुसार नीतिहरु, कानूनी र संरचनागत प्रबन्ध, मानव संशाधन, उपकरण र भौतिक पुर्वाधारलगायतका क्षेत्रमा एकिकृत विकास पहल गरिएको जानकारी दिनुभयो ।
यस्तै निस्शुल्क स्वास्थ्य सेवा विस्तार गरिएको जनाउदै स्वास्थ्य सेवाको गुणस्तरीयता अभिबृद्धि र प्रभावकारी नियमन समेत गरिएको बताउनुभयो । नसर्ने रोग नियन्त्रणका लागि कार्यक्रम विस्तार अन्तर्गत यो आर्थिक वर्षमा एक हजार ठाउँमा ‘पेन प्याकेज’ पुग्ने उहाँको दावी थियो ।
