काठमाडौं – सरकारले स्वास्थ्य मन्त्रालय अन्तर्गतका चार वटा स्वास्थ्य विज्ञान प्रतिष्ठानमा उपकुलपति नियुक्त गरेको छ। फागुन १७ गतेको मितिमा प्रतिष्ठानका कुलपति एवं प्रधानमन्त्री पुष्पकमल दाहालले रिक्त रहेका चार वटा प्रतिष्ठानका उपकुलपति नियुक्त गर्नु भएको हो ।
उपकुलपति चयनका लागि सरकारले गठन गरेको सर्च कमिटीले सिफारिस गरेका तीन–तीन जनाको सुचीबाट प्रधानमन्त्रीले उपकुलपतिहरुको नियुक्त गर्नु भएको छ । पाटन स्वास्थ्य विज्ञान प्रतिष्ठानमा डा. भरतकुमार यादव, विपी कोइराला स्वास्थ्य विज्ञान 
प्रतिष्ठान धरानमा डा. राजकुमार रौनियार, पोखरा स्वास्थ्य विज्ञान प्रतिष्ठानमा डा. बुद्धिबहादुर थापा र कर्णाली स्वास्थ्य विज्ञान प्रतिष्ठानमा डा. राजेन्द्र वाग्लेलाई नियुक्त उपकुलपतिमा नियुक्त गरिएको छ।
प्रधानमन्त्रीका प्रेस सल्लाहकार गोविन्द आचार्यले केही दिनअघि नै उपकुलपतिहरु चयन भइसकेको जानकारी दिनुभयो। निर्वाचन आयोगले निर्वाचन आचार संहिता लागू गरिसकेकाले सरकारले आचार संहिता लागू हुनुभन्दा अगाडिकै मितिमा उपकुलपतिहरु चयन गरेको हो। रिक्त उपकुलपति छनौट गर्न सरकारले स्वास्थ्य मन्त्री गगन थापाको संयोजकत्वमा सर्च कमिटी गठन भएको थियो।
सो कमिटीमा स्वास्थ्य सचिव डा सेनेन्द्रराज उप्रेती र राष्ट्रिय योजना आयोगका सदस्य डा. गीताभक्त जोशी सदस्य थिए। उक्त कमिटीले उपकुलपति हुन चाहनेका लागि कार्ययोजना सहित पेश गर्न सार्वजनिक सूचना जारी गरेको थियो। सोही कार्यायोजनाको आधारमा तीन तीन जनाको नाम सिफारिस गरेको थियो।
