काठमाडौं – त्रिभुवन विश्वविद्यालयले २८ वर्षे उमेर हदबन्दी तोकेर स्ववियु चुनाव गर्ने कार्यतालिका सार्वजनिक गरेको छ । ठूला विद्यार्थी संगठनका नेताहरु चुनावका लागि तयार पनि भइसकेका छन, तर ती नेताहरु भने स्ववियुमा उम्मेद्वार बन्न योग्य छैनन् ।
प्रायः सबै संगठनका पदाधिकारीले २८ वर्षे उमेर हदबन्दी पार गरिसकेको छ । प्रमुख विद्यार्थी संगठनको नेतृत्वमा रहेका पदाधिकारीहरु ३० देखि ४० वर्ष उमेर समूहका छन् ।
केही विद्यार्थी नेताले भने ४० वर्ष उमेर पनि काटिसकेका छन् । नेविसंघका अधिकांश नेता ३५ देखि ४२ वर्षभित्रका छन् ।
अध्यक्ष नैनसिंह महरले आफू ४२ वर्ष पुगेको बताउनुभयो । अनेरास्ववियुका पदाधिकारी अधिकांश ३० देखि ३५ वर्षभित्रका छन् । विद्यार्थी नेताहरु आफैंले बताएको उमेरअनुसार पदाधिकारीमा २६ वर्षदेखि सबैभन्दा बढी ३५ वर्ष उमेरका छन् ।
तीन संगठनमा चार नेतामात्र योग्य त्रिवि सभाले कायम गरेको उमेर हदबन्दीअनुसार स्ववियु चुनावमा उम्मेदवार हुन तीन संगठनका पदाधिकारीभित्रका चार नेता मात्र योग्य छन् । नेविसंघका १५ पदाधिकारीमध्ये एकजना मात्र २८ नकटेका छन् ।
अनेरास्ववियुमा अध्यक्षदेखि विभिन्न आयोग अध्यक्षसम्म्का १७ नेतामध्ये एक र अनेरास्ववियु क्रान्तिकारीमा महासचिवसम्मको २७ सदस्यीय कार्यालय टिममा एकजना मात्र २८ वर्षभन्दा कम उमेरका छन् ।नेविसंघका कोषाध्यक्ष शिव रिमाल २८ वर्षमुनिका छन् । उहाँले आफू २७ वर्ष पुगेको दाबी गर्नुभयो । ‘मेरो उमेरले स्ववियु चुनावमा लड्न सक्ने भए पनि उम्मेदवार बन्दिनँ,’ उहाँले भन्नुभयोे ।
अनेरास्ववियुकी अनुशासन आयोग अध्यक्ष निशा अधिकारी मात्र स्ववियु चुनावका लागि योग्य हुनुहुन्छ । उहाँ २६ वर्षकी हुनुभयो । अनेरास्ववियु क्रान्तिकारीको सचिवालयसम्मका नेताहरुमा उपाध्यक्षद्वय मिलन एसमी र रविकिरण यादव मात्र २७ वर्षका हुनुहुन्छ ।
