काठमाडौँ – अध्यात्म साहित्य एवम् जीवनदर्शनका क्षेत्रमा कलम चलाउँदै आउनुभएका लेखक आचार्य लक्ष्मण भण्डारीले आफ्नो नयाँ कृति ‘सुदृढ मन, सुन्दर जीवन’ सार्वजनिक गर्नुभएको छ । 
आईतबार चितवनमा आयोजित विशेष कार्यक्रममा चर्चित योग गुरु एवम् प्राकृतिक चिकित्सक डा. हरिप्रसाद पोखरेल (मानसाग्नि) एवम नेपाल सरकार वन विभागका पूर्व महानिर्देशक गोकुलराज पाण्डेले संयुक्त रूपमा पुस्तकको सार्वजनिक गर्नुभयो । दशकौँ देखि अध्यात्मदर्शन र उत्प्रेरणा साहित्यमा कलम चलाउँदै आउनुभएका लेखक भण्डारीको सार्वजनिक पुस्तकमा श्रीमद्भगवद्गीताका सन्दर्भहरूलाई हाम्रो प्रत्यक्ष जीवन दर्शनसँग जोडेर तार्किक एवम् व्यावहारिक ढङ्गले प्रस्तुत गरिएको छ ।
गीता पढ्न र पढेर त्यसभित्रको दर्शनलाई स–सम्मान जीवनमा आत्मसात् गर्न प्रेरित गर्ने शैलीमा लेखकले पुस्तकलाई अगाडि ल्याउनुभएको छ । कुल २६ अध्यायमा विभाजित गरेर लेखिएको पुस्तक ‘सुदृढ मन, सुन्दर जीवन’ सहित लेखक भण्डारीका अनमोल दृष्टान्त, सनातन जीवनदर्शन, जीवनमूल्य, संसार जित्ने सूत्र र हामीहाँसे संसार हाँस्छ नामक पुस्तकहरू यसअघि नै प्रकाशित छन् । 
कुल २२३ पृष्ठमा प्रकाशित पुस्तकलाई साङ्ग्रिला बुक्स प्रालि काठमाडौँले बजारमा ल्याएको हो । सोही अवसरमा आयोजित कार्यक्रममा जिल्ला वन कार्यालय चितवनले भरतपुरले वागीश्वरी आध्यात्मिक परिषद् एवम् योगी नरहरिनाथ आश्रमलाई करिब ६ बिगाह क्षेत्रफलको वागीश्वरी क्षेत्र धार्मिक वनका रूपमाउपभोग र विकास गर्न पाउने गरी हस्तान्तरण गरेको छ ।
