क्रिसमसले आपसी विश्वास, प्रेम र ऐक्यबद्धताको भावनालाई प्रगाढ बनाओस् : राष्ट्रपति पौडेल

समाचार सुन्नुहोस : 

काठमाडौँ – राष्ट्रपति रामचन्द्र पौडेलले चाडपर्वहरूले विविध सांस्कृतिक पहिचान र धार्मिक आस्थाका समुदायबीच आपसी सद्भाव, सहिष्णुता र एकताको भावना बढाउन योगदान दिने विश्वास व्यक्त गरेका छन्।

‘क्रिसमस डे’ को अवसरमा इसाई धर्मावलम्बीहरूलाई सुख, शान्ति र सुस्वास्थ्यको शुभकामना दिँदै राष्ट्रपति पौडेलले यस्ता पर्वहरूले राष्ट्रिय एकतालाई अझ सुदृढ बनाउने उल्लेख गरेका छन्। उनले इसाई धर्मावलम्बीहरूको पर्व क्रिसमसले सबैलाई विश्वास, प्रेम र ऐक्यबद्धताको भावना प्रगाढ बनाउने प्रेरणा मिलोस् भनेर कामना गरे।

इसाई धर्मका अनुयायीहरू प्रत्येक वर्ष डिसेम्बर २५ का दिन जिसस क्राइस्टको जन्मोत्सवलाई धार्मिक तथा सांस्कृतिक उत्सवका रूपमा मनाउँछन्। यस अवसरमा देशका काठमाडौँ, ललितपुर, भक्तपुर, पोखरालगायत विभिन्न स्थानमा विशेष कार्यक्रमहरूको आयोजना हुँदै आएको छ।