टोकियो – गल्कोट समाज जापानको साँगीतिक कार्यक्रम टोकियोमा सम्पन्न भएको छ । बिशाल जनसहभागिताका साथ सम्पन्न गल्कोट धमाकाको जापानका लागि राजदूत एवं प्रमुख अतिथि डा. मदनकुमार भट्टराईले पानसमा बत्ति बाली उदघाटन गर्नुभएको थियो ।
गल्कोट समाज जापान टोकियो क्षेत्रिय कमिटीका अध्यक्ष केहरसिंह बस्नेतको सभापतित्वमा भएको कार्यक्रममा केन्द्रिय उपाध्यक्ष नरबहादुर थापाले स्वागत मन्तब्य दिनुभएको थियो । सो अवसरमा गल्कोट समाजको गतिबिधिबारे प्रकाश पार्दै महासचिव तेजिन्द्रबहादुर थापाले नयाँ बर्षको शुभकामना ब्यक्त गर्नुभएको थियो ।
यसैगरी बिशेष अतिथिहरु एनआरएन एशिया प्यासिफिक उपसंयोजक किरणविक्रम थापा, एनआरएन जापानका अध्यक्ष ओम गुरुङले पनि कार्यक्रम सफलतको कामना गर्नुका साथै नयाँ बर्षको शुभकामना दिनुभएको थियो ।
प्रमुख अतिथिको आसनबाट बोल्दै राजदूत डा. भट्टराईले जापानमा गल्कोटबासीहरुले आफ्नो गाउँ र ठाउँका लागि देखाएको सक्रियता र क्रियाशिलताको प्रशंसा गर्दै नयाँ बर्षको शुभकामना ब्यक्त गर्नुभयो ।
सो अवसरमा अतिथि कलाकारहरु बिष्णु खत्री, बसन्त थापा र टिका पुनलाई फूलको गुच्छा र खार्दापण गरी स्वागत गरिएको थियो । पहिलो औपचारिक कार्यक्रमको सँस्थाका उपाध्यक्ष हर्क थापाले सञ्चालन गर्नुभएको थियो भने साँगीतिक कार्यक्रमको सल्लाहकार बेलू थापाले सञ्चालन गर्नुभएको थियो ।
कार्यक्रममा रामकृष्णबम मल्ल र सूर्य खड्काले लोकगीत प्रस्तुत गरेर माहौल तताउन नपाउँदै गायिका टिका पुनले आफ्ना सुमधुर गीतहरु पस्केर दर्शकहरुलाई छमछमी नचाईन् । लगत्तै जितु नेपाल (मुन्द्रे) ले नेपाली समाजमा बिद्यमान बिभिन्न बिकृति तथा बिसंगतिहरुको उछिट्टो काढ्दै दर्शकहरुलाई पेट मिचिमिचि हंसाएका थिए ।
कार्यक्रममा हालै आयोजित भलिबल प्रतियोगितामा प्रथम स्थान हासिल गरेका गल्कोट समाजको भलिबल खेलाडि टिमलाई सम्मान पनि गरिएको थियो ।
कार्यक्रममा स्थानिय कलाकारहरु ऋषि पौड्याल, युवराज आचार्यले पनि आफ्ना लोकभाकाहरु पस्केर दर्शकहरुलाई नचाएका थिए ।
लगत्तै अतिथि कलाकार बसन्त थापाले डाडै फुर्के सल्लो, रुमाल हल्लाइ हल्लाई, हाइ गेन्की देस, अझै कन्य हो लगायतका लोकप्रिय गीतहरु गाएर दर्शकहरुलाई भरपुर मनोरञ्जन प्रदान गरे । त्यसपछि अर्का अतिथि कलाकार बिष्णु खत्रीले घामभन्दा नि जुनको- किन यति माया लाग्छ आफ्नो भन्दा उनको, भरिया दाईले बिसाउने भारी, पल्टनबाट छुट्टीमा आको, दुना टपरीलगायतका उनका चर्चित गीतहरु प्रस्तुत गरेर दर्शकहरुलाई नचाउनु नचाएका थिए ।
यसैगरी कार्यक्रममा बाल कलाकार दिलिप खत्रीले पनि आफ्नो बाल प्रतिभा प्रस्तुत गरेर कार्यक्रममा नौलो स्वाद पस्केका थिए । यसैगरी कार्यक्रममा श्रीकृष्णबम मल्ल र रामकृष्णबम मल्लले फुल्यो भमरा बोलको युगल गीत गाएका थिए । त्यस अघि गायक श्रीकृष्णबम मल्ललाई पनि खादार्पण गरी सम्मान गरिएको थियो ।
कार्यक्रमको अन्तमा, बिष्णु खत्री र टिका पुनको बिचमा दोहोरी जमेको थियो । हलभरि खचाखच उत्साहबर्द्धक दर्शकहरुको उपस्थितिकाबिच गल्कोट धमाकाको अन्तिम कार्यक्रम आज टोकियोमा सम्पन्न भएको हो । ***
