सोलुखुम्बु– एक मिनेट फोन गरेको शुल्क कति तिर्नुपर्ला ? सहजै अनुमान गर्न सकिन्छ, रु पाँच वा रु सात तर जिल्लाको पर्यटकीय क्षेत्र मेरापिकमा भने एक मिनेट फोन गरेको शुल्क रु १८० देखि रु २०० सम्म तिर्नुपर्छ ।लामो समयदेखि यस क्षेत्रमा एसटिएम फोन सेवा अवरुद्ध भएपछि सेवाग्राही चर्को मूल्य तिरेर फोन गर्न बाध्य भएका छन् । एसटिएम फोन सेवा अवरुद्ध भएपछि यहाँका सेवाग्राहीले महँगो शुल्क तिरेर थोरिया फोनबाट सेवा लिँदै आएका छन् । जिल्लाको विकट कोसीपारिको गाविस बुङको थाङ्ना, थारे र कोठेमा रहेको एसटिएम फोनमा १० महिनादेखि स्याटलाइटमा खराबी आएपछि फोनसेवा अवरुद्ध भएको स्थानीय बासिन्दाले बताए ।
फोन अवरुद्ध भएपछि यहाँका होटल व्यवसायी, पर्यटन व्यवसायी र चौँरीपालक तथा कृषकले समस्या भोगिरहेका छन् । यहाँका सरोकारवालाले अवरुद्ध टेलिफोनका बारेमा पटक पटक सम्बन्धित निकायमा जानकारी गराए पनि सुनुवाइ नभएको गुनासो गरे । एसटिएम कम्पनीले भने चाँडै अवरुद्ध फोन मर्मत गर्ने बताएको छ ।
