काठमाडौं– माओवादी विद्यार्थी नेतृ बिना मगरसँग तेस्रो विवाह गरेर बेपत्ता छोरा प्रकाश दाहालबारे एकीकृत नेकपा माओवादीका अध्यक्ष पुष्पकमल दाहाल ‘प्रचण्ड’ले पहिलोपटक मुख खोलेका छन् ।घटना र विचार साप्ताहिकलाई दिएको अन्तर्वार्तामा प्रचण्डले छोराको गलत कामबारे पनि धारणा राखेका छन् । ‘तर मैले बुझेको कुरा के भने, उ धेरै सोझो मान्छे हो । असाध्यै सोझो हो तर परिस्थिति त्यस्तै त्यस्तै हुँदै जाँदा यस्तो भो,’ उनले भनेका छन् ।
यस्तो छ अन्तर्वार्तामा प्रकाशबारे प्रचण्डको धारणा
– प्रकासजी (छोरा)सँग अहिले कस्तो कुराकानी भइरहेको छ ?
उसँग अहिले मेरो कुनै सम्पर्क छैन । उसले अरु अरुलाई म्यासेज पठाइरहेको मलाई जानकारी छ । मिडियामा पनि त्यो कुरा आइरहेकै छ । म र मेरो श्रीमतीको अहिले कुनै खालको सम्पर्क छैन ।
– त्यत्रो जनयूद्धमा साथ दिएको छोरो अहिले साथमा नहुँदा कस्तो लागेको छ ?
मानवीय मन भएका सबैलाई पीडा त भइ नै हाल्छ । मेरो निम्ति त्यो धेरै अनौठो विषय होइन । छोराछोरी भने जस्तो हुनु पर्छ भन्ने कुरा हुँदैन । त्यसभित्र धेरै फ्याक्टरले काम गरिरहेको हुन्छ । तर मैले बुझेको कुरा के भने, उ धेरै सोझो मान्छे हो । असाध्यै सोझो हो तर परिस्थिति त्यस्तै त्यस्तै हुँदै जाँदा यस्तो भो । हामीले पनि परिवारका तर्फबाट छोरा छोरीलाई राम्रो पढाउने, राम्रो गर्ने भन्ने कुरा पनि हुन सकेन । ध्यान दिने फुर्सद पनि भएन । यूद्धको बेलामा बन्दुक बोकेर हिडेकै हो उ । उ प्रति अहिले पनि मेरो घृणा छैन । उसले गल्ती गर्यो तर अब महसुस गर्नु पर्छ । उसले गरेको गल्ती नै हो ।
– तपाई नाति (प्रकाशकी दोस्री श्रीमतीको सन्तान)लाई धेरै माया गर्नु हुन्छ होइन ?
हो, म एकदमै माया गर्छु । अहिले पनि टेन्सन भएपछि विहान बेलुका नातीसँग खेलेपछि टेन्सन मुक्त हुन्छु ।
प्रकाश–बिना काठमाडौं लाजिम्पाटस्थित घरबाट बाहिरिएकै दिन झापाको सुरुंगास्थित चेकपोस्टमा भेटिएको प्रहरीले मुख्यालयलाई जानकारी गराएको छ । प्रहरीले उनीहरु बिराटनगरसम्म हवाईजहाजमा गई त्यहाँबाट इटहरी, उर्लाबारी, दमक, सुरुंगा हुँदै काँकडभिट्टाबाट भारतको पटना गएको अनुमान गरिएको छ ।
काठमाडौंबाट प्रकाश भने सगरमाथा चढ्न सघाउने शेर्पा साथीहरुसँग भेट्न भनी निस्किएका थिए । उनको फेसबुक बन्द छ । तर केही दिनअघि एकैछिन फेसबुकमा झुल्किएका उनले माओवादी केन्द्रीय सदस्य कृष्ण केसीप्रति आक्रोस व्यक्त गरेका छन् ।
बिना शान्ति र संविधानका लागि भन्दै सगरमाथा आरोहण दलमा प्रकाशसँगै थिइन् । सगरमाथा आरोहणमा जानेक्रममा दुवैबीच हिमचिम बढेको थियो । आधार शिविरमा पुगेपछि एकाएक हराएका प्रकाश–बिनालाई सम्हालेर ल्याउन टोलीका अन्य सदस्यलाई कठीन भएको थियो ।
स्रोतका अनुसार सगरमाथा आरोहणका लागि बिनाले पहिल्यै नै निर्णय गरे पनि प्रकाश मानेका थिएनन् । बिनाले पछि कर गरेपछि प्रकाश पनि सगरमाथा चढ्ने निर्णयमा पुगेका थिए ।
काठमाडौं फर्किए पनि विनासँग नजिकिएपछि अध्यक्ष प्रचण्डले प्रकाशलाई पटक पटक सचेत गराएका थिए । तर प्रकाशले अन्य कुनै खालको सम्बन्ध नभएको प्रचण्डलाई बताउँदै आएका थिए । मगर पनि विवाहित हुन् । उनका पति शंकर अधिकारी अखिल क्रान्तिकारीका केन्द्रीय सदस्य हुन् ।
प्रकाशले भने यसअघि नै दुईवटा विवाह गरेका थिए । माओवादी सचिव एवं पर्यटन मन्त्री पोस्टबहादुर बोगटीकी छोरी प्रभालाई छाडेर पोखराकी अर्की माओवादी कार्यकर्ता सिर्जना त्रिपाठीलाई उनले दोस्री श्रीमती बनाएका छन् ।
उनीबाट डेढ वर्षअघि छोरा जन्मिएको थियो ।
