संखुवासभा– अन्नपूर्ण पोष्टका संखुवासभा समाचारदाता किशोर बुढाथोकीमाथि ज्यान लिने उद्येश्यले साङ्घातिक आक्रमण गर्ने दुई जनालाई आइतबार जिल्ला अदालत चैनपुरले पाँच बर्ष कैदको फैसला सुनाएको छ ।
न्यायाधीश शालिकराम कोइरालाको इजलासले पत्रकारमाथि आक्रमण गर्ने खाँदबारी नगरपालिका १० का २२ वर्षीय विकास राई र खाँदबारी १ का २४ वर्षीय रुपक राईलाई ५÷५ बर्ष कैदको फैसला सुनाएको हो । पत्रकार बुढाथोकीका मामा राजेन्द्र कार्कीले दर्ता गराएको ज्यान मार्ने उद्योगको मुद्धामा अदालतले दुवै जनालाई दोषी ठहर गर्दै कैद सजाय सुनाएको हो ।
नेपाल पत्रकार महासंघ संखुवासभाका सहसचिव समेत रहेका बुढाथोकीलाई गत साउन २६ गते राती खाँदबारी नगरपालिका १० स्थित आफ्नै डेरामा सुतिरहेको बेला स्थानीय विकास र रुपकको समुहले अपहरणको शैलीमा एकान्त जंगलमा लगेर निर्घात कुटपिट गर्नुका साथै धारिलो हतियार खुकुरी, लाठी र साइकलको चेन समेतले प्रहार गरेका थिए । बुढाथोकी विराटनगरस्थित नोबेल मेडिकल कलेजमा उपचार गराएर तीन महिनापछि काममा फर्किएका छन् ।
बुढाथोकीका तर्फबाट जिल्ला न्यायाधिवक्ता कृष्णबटु भण्डारीले बहस गरेका थिए । लामो आइतबार भएको पेशीको अन्तिम सुनुवाईपछि ज्यान मार्ने मुद्धा अन्तर्गत उनीहरुलाई अदालतले ५÷५ बर्षका लागि कैदको फैसला गरेको अदालतका निमित्त श्रेस्तेदार योगनारायण श्रेष्ठले बताए ।
उनीहरुलाई मुलुकी ऐनको अदालती वन्दोवस्तीको ११८ को (२) वमोजिम पुर्पक्षको लागि थुनामा राखी मुद्धाको कारबाही चलाउन गत भदौ २६ गते अदालतले आदेश दिएको थियो ।
बुढाथोकीलाई आक्रमण गरेर फरार रहेका अभियुक्त तथा घटनाका मुख्य योजनाकार विकास राईलाई गत भदौ ८ गते राति संखुवासभाकै दिदिङ गाविस र उनका सहयोगी रुपक राईलाई भदौ २ गते याफु गाविसवाट पक्राउ गरेर प्रहरीले अदालतमा मुद्धा दायर गरेको थियो ।
अदालतको फैसलाको जिल्ला स्थित सञ्चारसँग सम्बद्ध विभिन्न संघ संस्थाहरुले स्वागत गरेका छन् । नेपाल पत्रकार महासंघ, प्रेस चौतारी नेपाल, प्रेस युनियन, क्रान्तिकारी पत्रकार संघ समेतले अदालतको फैसलाको स्वागत गर्दै कानुनी राज्यको सम्मान गर्नु पर्नेमा जोड दिएका छन् ।
