काँकडभिट्टा- वैदेशिक रोजगारका लागि वैधानिकरुपमा खाडी मुलुक पठाइदिने भन्दै झुक्याएर युवतीलाई भारत लैजान लागेको अवस्थामा तीनजना दलाललाई प्रहरीले पक्राउ गरेको छ ।
झापाको बैगुनधुरा–८ का एजेण्ट नरबहादुर मगर, सोही ठाउँकी कुमारी मगर र मोरङको केराबारी–८ का विमलकुमार भुजेललाई प्रहरीले पक्राउ गरेको हो ।
भारत प्रवेश गर्न लागेको अवस्थामा काँकडभिट्टा इलाका प्रहरी कार्यालयको प्रहरी टोलीले उनीहरुलाई पक्राउ गरेको इन्स्पेक्टर सुकदेव खनालले बताए ।
धनकुटाको हात्तीखर्क–८ की २९ वर्षीया ज्ञानमाया राना मगर र मोरङको लेटाङ–४ की ३८ वर्षीया खिनमाया ठाडा मगरलाई उनीहरुले गत कात्तिक २९ गते झापाको दमकस्थित एक होटलमा राखेर ३० गते भारत लैजान लागेका थिए ।
प्रहरीले सोधेमा आफूहरु श्रीमान्–श्रीमती भएको बताउन सिकाएको पीडित ज्ञानमायाले जनाइन् । सोधपुछ गर्दा भुजेल र मगरले उनीहरु आफ्नै श्रीमती भएको बताएर झुक्याउन खोजेको इन्स्पेक्टर खनालले बताए ।
सोझोपनको फाइदा उठाउँदै बेचविखनकै लागि उनीहरुलाई भारत लैजान लागेको प्रहरीको अनुमान छ । दुवै महिलासँग पासपोर्टलगायत्का कागजातसमेत नभएको प्रहरीले जनाएको छ ।
