महासचिव मोहन वैद्य किरण अस्पताल भर्ना

काठमाडौं – क्रान्तिकारी कम्युनिष्ट पार्टी नेपालले पार्टी महासचिव मोहन वैद्य किरणको स्वास्थ्य अवस्था स्थिर रहेको बताएको छ । सो पार्टीका कार्यवाहक महासचिव गौरवले शनिबार एक विज्ञप्ति जारी गर्दै वैद्यको स्वास्थ्य अवस्था स्थिर रहेको जानकारी दिएका हुन् ।

महासचिव वैद्य केही दिनदेखि त्रिवि शिक्षण अस्पताल महाराजगञ्जमा उपचाररत रहेको जनाउँदै विज्ञप्तिमा उनको शीघ्र स्वास्थ्य लाभाको कामना समेत गरिएको छ । श्वासप्रश्वासमा समस्या भएपछि ७८ वर्षीय वैद्यलाई विहीबार त्रिवि शिक्षण अस्पताल महाराजगञ्जमा भर्ना गरिएको हो ।

गत महिना आयोजित एकता महाधिवेशन वेला पनि स्वास्थ्यमा समस्या आएकाले पूरै समय बन्दसत्रमा बस्न सकेका थिएनन् । गत वर्ष पनि उनलाई त्रिवि शिक्षण अस्पतालमा करिब एक हप्ता भर्ना गरेर उपचार गरिएको थियो ।