काठमाण्डौं– एकीकृत नेकपा माओवादीका अध्यक्ष पुष्पकमल दाहाल प्रचण्ड र वरिष्ठ उपाध्यक्ष मोहन वैद्य किरणले पार्टीमा विचार र कार्यदिशामै विवाद भैरहेको बताउनुभएको छ । पार्टी केन्द्रीय समिति बैठकमा प्रचण्डले अहिलेको विवाद कुनै सामान्य घटनामा आधारित नभई राजनीतिक लाईन र कार्यदिशाको विवाद भएको बताउनुभयो ।बैठकपछि प्रवक्ता दिनानाथ शर्माले दिएको जानकारी अनुसार बैठकमा प्रचण्डले भन्नुभयो “कार्यदिशामै अन्तर छ । राजनीतिक लाइन नै फरक पर्यो । पार्टीको विवाद कुनै साना–तिना घटना भएर आएको होइन । हामी कुनै घटना बिषेशमा रहेर भन्दा पनि विचार केन्द्रीत छलफल गर्यौ भने मात्र सहि निकास निकाल्न सक्छौ ।”
पार्टी गंभीर अवस्थामा रहेकोले अब विधिसम्मत ढंगले विचार केन्द्रीत छलफल गरेर समाधान खोज्नुपर्नेमा प्रचण्डले जोड दिएको प्रवक्ता दीनानाथ शर्माले जानकारी दिनुभयो ।
जवाफमा मोहन वैद्यले भन्नुभयो “अहिलेको विवाद चुनवाङ बैठक देखिकै अन्तर हो । यसमा गम्भीर छलफल गर्न आवश्यक छ । पार्टी पुरै दक्षिणपन्थी बाटोमा गयो । यस्तै हो भने संविधानसभाको औचित्य समाप्त हुन लाग्यो ।” वैद्यले शान्ति प्रकृया पनि अप्ठ्यारो स्थितीमा पुगेको बताएको प्रवक्ता शर्माले जानकारी दिनुभयो । माओवादी केन्द्रीय समिति बैठक मंगलवार बिहान ११ बजे बस्ने गरी स्थगित भएको छ ।
