टीकापुर – एमाओवादी अध्यक्ष पुष्पकमल दाहालले हिमाल, पहाड र तराईका जनताले आफ़ुलाई राष्ट्रपति बनाई सकेको दाबी गरेका छन् । उनले अब राष्ट्रपति हुन कुनै ठूलो कुरा नभएकोले पार्टीलाई दुई तिहाई मतले विजयी गराउन कार्यकर्ता संग आग्रह गरेकाछन् ।
कांग्रेसले ००७ साल देखि ०४६ साल सम्म बहुमतमा रहेपनि उसको रुख बुढो भई खोक्रो भई ढलेकोले उसको अस्तित्व समाप्त भएको बताए । कांग्रेसले राजासँग मिलेर संकटकाल लगाई एमाओवादीलाई समाप्त गर्ने खोजेको आरोप लगाएको बताए । उनले गणतन्त्र र संघियता उनिहरुले चाहेको होइन,दश वर्ष जनयुद्ध गरेको एमाओवादी पार्टीले नै ल्याएको बताए ।
एमाले पार्टी घोर अवसरवादी,जनविरोधी र बेइमानको पार्टी भएको भनेका छन् । अध्यक्ष दाहालले एमाले यति अवसरवादी पार्टी भएकोले उसले जल्दा वल्दा नेता मदन भण्डारीलाई बचाउन नसकेको आरोप लगाए । एमालेको पतन मदन भण्डारीको अवशानपछि भएको उनले दावी गरे ।
नेकपा-माओवादीले गरेको देशव्यापी बन्दकाबीच कैलालीको टीकापुरमा मेची-महाकाली राष्ट्रिय अभियान अन्तर्गत एमाओवादीको चुनावी सभा भएको छ ।
विभिन्न राजनीतिक दलले गर्ने सभामा आउन टयाक्टर बस मोटरसाइकल लगायतका साधनको प्रयोग हुने भएपनि सभामा अधिकांश साइकलमा आएका थिए ।
बन्दका कारण टीकापुर बजार बन्द भएकोले यहाँका व्यापारी तथा विभिन्न कार्यालयमा कार्यरत कर्मचारी पनि सभामा सहभागी भएका थिए ।
सभालाई एमाओवादीका अध्यक्ष पुष्पकमल दाहालले गत संविधान सभाको निर्वाचनमा माओवादीको बहुमत नभएकोले पहिचान र अधिकारसहितको संविधान दिन नसकेकोले यो संविधानसभाबाट एमाओवादीलाई बहुमत दिए जनताको संविधान दिने बताए ।
उनले भने-‘संविधान सभा माओवादीको एजेन्डा हो र पहिचानसहितको संविधान संस्थागत गर्ने संविधान सभाको चुनाव भएकोले एमाओवादीलाई बहुमत दिन जरुरी छ जनताले ।’
२०५७ सालमा नेकपा माओवादीको दोस्रो सम्मेलन हुँदा एकमतले संविधान सभाको एजेन्डा एकमतले पारित भएकोले मोहन वैद्यहरुले पनि आफुलाई सहयोग गर्ने बताए । उनले भने-‘हामीले शान्तिपूर्ण रुपमा संविधान सभा मार्फत जनतालाई अधिकार दिन खोजेको बेला जम्मा १५ सय मात्र मान्छे मरेका थिए तर नेपाली काग्रेसले उल्टो संकटकाल लाएर १५ हजार मान्छे मार्यो ।’
