समाचार सुन्नुहोस :
काठमाडौँ – भारतको महाराष्ट्रमा भएको रेल दुर्घटनामा ज्यान गुमाएका सात जना नेपालीका परिवारले क्षतिपूर्ति बापत जनही ६ लाख ५० हजार भारतीय रुपैयाँ (करिब १० लाख ४० हजार नेपाली रुपैयाँ) पाउने भएका छन्। भारतीय केन्द्र सरकारले १ लाख ५० हजार भारू र महाराष्ट्र सरकारले ५ लाख भारू क्षतिपूर्ति दिने घोषणा गरेका छन्। यसमध्ये ५० हजार भारू नगद तथा बाँकी बैंक खातामा जम्मा गरिने बताइएको छ।
महाराष्ट्रको जलगाउँ जिल्लाको पारधाडे तालुका पाचोरामा बिहीबार साँझ भएको रेल दुर्घटनामा १३ जनाको मृत्यु भएकोमा सात जना नेपालीसमेत रहेका छन्। दुर्घटनामा चार जना नेपाली घाइते भएका छन्। मृतकमध्ये अछामका नन्दाराम विक, उनकी श्रीमती मैसरा र छोरा हिमु; जयकला कामी, कैलालीकी कमला भण्डारी, बाँकेका राधेश्याम र मधेस प्रदेशका लच्छिराम पासी छन्।
मृतकको शव नेपाल ल्याउन र अन्त्येष्टि व्यवस्थापन गर्न महाराष्ट्र सरकारले निशुल्क एम्बुलेन्सको व्यवस्था गरेको प्रवासी नेपाली संघका मनीषकुमार भूमिले बताएका छन्। कमला भण्डारीको शव नेपाल ल्याइने छ भने नन्दाराम विकको परिवारको पुणेमा अन्तिम संस्कार गरिने छ। जयकला कामीको शव अछाममा ल्याउने तयारी भइरहेको छ। घाइते भएकाहरूको उपचार जारी रहेको छ।
