समाचार सुन्नुहोस :
काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेको थुनछेकसम्बन्धी बहस हेर्दाहेर्दैमा राखिएको छ। रुपन्देही जिल्ला अदालतमा जारी बहस आज नसकिएपछि यो प्रक्रिया भोलिका लागि सारिएको हो।
सुप्रिम सहकारी ठगी प्रकरणका मुख्य प्रतिवादी लामिछाने बुधबार अदालतमा उपस्थित भएका थिए। सोही दिन उनको बयान सकिएपछि बिहीबारदेखि थुनछेक बहस सुरु भएको हो। जिल्ला अदालतका न्यायाधीश प्रल्हादकुमार योगीको इजलासमा बहसको क्रम जारी रहेको छ। आज पनि अदालतले उनलाई परिवारको जिम्मा लगाउने आदेश दिएको छ।
बिहीबार सरकारी वकिलहरूले आफ्नो तर्क राखेका थिए। उनीहरूको तर्कपछि पीडित पक्षका तर्फबाट वरिष्ठ अधिवक्ता दिनेश त्रिपाठीले बहस गरे। यस्तै, पीडित पक्षबाट अर्का वरिष्ठ अधिवक्ता डा. सुरेन्द्र भण्डारीले आफ्नो बहस भोलि मात्र गर्ने भएका छन्। यो मुद्दामा अदालतले अन्तिम निर्णय लिनुअघि थप कानुनी बहस भोलि जारी रहनेछ।
