नागानो स्टेशन नजिक तीन जनामाथि छुरा प्रहार, एकको मृत्यु

टोकियो – जापानको एक मुख्य यातायात केन्द्र, नागानो स्टेशन नजिक तीन जनामाथि छुरा प्रहार भएको छ । बुधबार साँझ बस पर्खिरहेका उनीहरुमाथि अपरिचित व्यक्तिले छुरा प्रहार गरेका हुन् ।

घटनामा परेका एक ४० वर्षीय पुरुषको मृत्यु भएको छ भने छुरा हान्ने व्यक्ति फरार छन् । प्रहरीलाई साँझ करिब ८ बजे जेआर नागानो स्टेशनमा भएको घटनाबारे जानकारी गराइएको थियो । ३५ वर्षीय एक पुरुषको पछाडिबाट छुरा प्रहार भएको र उनको अवस्था गम्भीर देखिएको छ । एक महिलालाई आक्रमणपछि लड्दा चोटपटक लागेको अधिकारीहरूले बताएका छन् ।

आक्रमणकारीसँग छुरा भएको अनुमान गरिएको छ । आक्रमणकारी दुब्लो शरीर, करिब १६५ देखि १७५ सेन्टिमिटर अग्लो र ४० वर्षजतिका देखिएका छन् भन्ने प्रत्यक्षदर्शीहरूको भनाइ छ । आक्रमणकारी स्टेशनबाट दक्षिणतिर भागेको अनुमान गरिएको छ । घटना स्टेशन अगाडिको बस टर्मिनल र रेस्टुरेन्टहरू भएको क्षेत्रमा भएको हो ।